Дойду туһугар туруулаһа сылдьар байыастарга сүрүн тирэҕи, араас өрүттээх көмөнү үтүө көмөһүттэр оҥороллорун бары бэркэ билэбит. Оттон үтүө көмөһүттэргэ – нэһилиэк дьоно-сэргэтэ бүттүүн кыттыһан күүс-көмө буолаллар. Бэҕэһээ «Мы вместе – Мирный» үтүө көмөһүттэр хамсааһыннара Кириэстээх нэһилиэгин олохтоохторуттан АБДь байыастарыгар анаммыт гуманитарнай баһыылканы тутан үөрүүлэрэ икки бүк үрдээтэ.
Гуманитарнай баһыылкаҕа ичигэс наскыы, бэрчээккэ, ас-үөл, оҕолор уруһуйдара о.д.а. наадалаах мал-сал кичэллээхтик сууламмыт. Маны тэҥэ Кириэстээх нэһилиэгин “Харыстас” үтүө көмөһүттэрэ эми-тому хомуйан баһыылкаҕа уган ыыттылар.
“Ыаллаһа сытар улууспутугар, чуолаан Кириэстээххэ маннык эрэллээх, аһыныгас, үтүө дьон олороллорун билэр олус күндү. Оҥорбут үтүөҕүт бэйэҕитигэр үс төгүл эргилиннин. Эһиги көмөҕүт хайаан да тустаах аадырыстарыгар тиийиэхтэрэ”, – диэн Мииринэйдээҕи үтүө көмөһүттэр санааларын аһаҕастык этэллэр.
Бу сырыыга кириэстээхтэр байыастарга эрэ буолбакка, баһыылкалары бэрийэн-тэрийэн ыытар, сүүрэр-көтөр үтүө көмөһүттэргэ эмиэ болҕомтолорун уурбуттар. Ол курдук, кинилэргэ анаан минньигэс аһы-үөлү, сибиэһэй сүөгэйи, барыанньаны уонна бэйэ оҥорон таһаарар олохтоох килиэби уган ыыппыттарын сөҕө-махтайа кэпсээтилэр.
Елизавета ТИТОВА