Бүгүн Дьокуускай куоракка Д.К.Сивцев аатынан Государственнай опера уонна балет тыйаатырыгар Арассыыйа Дьоруойун Алексей Рафаэлович Петровы кытары бырастыыластылар. Дьоруойу тиһэх суолугар атаарыыга Ил Дархан Айсен Николаев кыттыыны ылла: «Алексей Рафаэлович төһө да кылгас, ол эрээри чаҕылхай олоҕу олорон ааста. Дойдутун туһугар хорсуннук туруулаһан Дьоруой үрдүк аатын сүгэри ситиспитэ. Төһө да кини ыарыйдар, күүстээх санаатын ыһыктыбатаҕа. Төрөөбүт Үөһээ Бүлүүтүн олус истиҥник саныыра. Бойобуой доҕотторун, үөлээннээхтэрин, ыччат дьону мэлдьи үтүө тылынан, санаатынан өйүүрэ. Толлубат модун санаалаах киһи буоларын көрдөрөрө… Өрөспүүбүлүкэ ыар сүтүктэннэ. Алексей Рафаэлович туһунан үтүө эрэ өйдөбүлү хаалларыахпыт».
Алексей Рафаэловичтыын бырастыылаһа Арассыыйа Дьоруойдара, анал байыаннай дьайыы кыттыылаахтара, уопсастыбаннас, норуот дьокутааттара кэлбиттэр.
Алексей Рафаэлович штурмовик быһыытынан анал байыаннай дьайыыга хас да нэһилиэнньэлээх пууну босхолооһуҥҥа кыттыыны ылбыта. Кимэн киирии кэмигэр төһө да эчэйии ыллар, ыарахан ыарыыны тулуйан туран 8 күнү устата позицияны соҕотоҕун тутан сыппыта, инньэ гынан туруоруллубут сорудаҕы чиэстээхтик толорбута. Ол иһин, от ыйын 6 күнүгэр 2025 сыллаахха дойду бэрэсидьиэнин Владимир Путин уурааҕынан Арассыыйа Дьоруойун үрдүк аатын сүкпүтэ. Саха сиригэр 12 Арассыыйа Дьоруойа буолбута.
Алексей Рафаэловыһы дойдутугар Үөһээ Бүлүүгэ Маҕаас нэһилиэгэр кистиэхтэрэ.
«Сунтаар сонуннара»
Саргына СКРЯБИН хаартыскаҕа түһэриитэ, ЯСИА
