Дьарыктаах буолуу сулууспата байыаннай дьайыы кыттыылаахтарын уонна кинилэр дьиэ кэргэттэрин үлэнэн хааччыйарга араас суолу тобулар. Ол курдук, сыл саҥатыттан байыаннай дьайыы 94 кыттыылааҕын уонна кинилэр 36 дьиэ кэргэннэрин үлэнэн хааччыйдылар диэн Ил Дархан пресс-сулууспата иһитиннэрэр.
Сунтаарга ыам ыйын 21 күнүгэр ыытыллыбыт “В кругу СВОих” диэн аахсыйа чэрчитинэн Дьарыктаах буолуу киинигэр 3 байыаннай дьайыы кыттыылааҕа үлэнэн хааччыллыы, өйөбүллэр тустарынан иһитиннэрии ыллылар. Бу күн кииҥҥэ кэлбит бэтэрээннэр бэйэ дьыалатын арынан үлэлиир санаалаахтарын эттилэр. Ол курдук, байыаннай дьайыы кыттыылаахтара тыа хаһаайыстыбатын салаатынан уонна тимир көлө өрөмүөннүр мастарыскыай арынарга хантан, хайдах саҕалыырга сүбэлэри ыллылар. Киин үлэһиттэрэ байыаннай дьайыы кыттыылаахтарыгар уонна кинилэр дьиэ кэргэттэригэр оҥорор көмөлөрүн сиһилии быһааран биэрдилэр. Дойду Бэрэсидьиэнэ Владимир Путин ыйыытынан “Кадры” диэн национальнай бырайыагынан эбии үөрэхтээһин ыытылларын билиһиннэрдилэр.
Маннык тэрээһиннэр байыаннай дьайыы кыттыылаахтара уопсастыбаҕа уонна эйэлээх олоххо төннөллөрүгэр улахан суолталаахтар.
«Сунтаар сонуннара»