Сунтаардааҕы 31№-дээх баһаары утары охсуһар этэрээт үлэһиттэрэ анал байыаннай дьайыы кыттыылаахтарыгар, кинилэр дьиэ кэргэттэригэр туох кыалларынан көмөлөһөргө, өйөбүл-тирэх буоларга куруук бэлэмнэр.
Бу күннэргэ Бүлүүчээннээҕи 7№-дээх олохтоох баһаарынай чаас уолаттара анал байыаннай дьайыыга дойду көмүскэлин туһугар олоҕун толук уурубут, хорсун байыас Андрей Куприянов төрөппүттэригэр гараж тутан улахан көмөнү оҥордулар.
Андрей төрөппүттэрэ Маргарита Ильинична уонна Афанасий Александрович кырдьар саастарыгар күүс-көмө буолуохтаах уолларын сүтэрэн, маннык көмө тиһиктээхтик салҕанарыгар, болҕомто уҕараабатыгар эрэнэллэр. Баһаарынай чаас үлэһиттэригэр тапталлаах уолларын суохтаппакка, кэлэн көмө-имэ буолбуттарыгар махталларын биллэрэллэр.
Андрей маҥнай быстах хомуурга ыҥырыллан барбыта. Ол кэннэ бааһырыы ылан дойдутугар төннөн кэлбитэ эрээри, хорсун санаата, дойдуга бэриниилээх буолуута баһыйа тутан бэйэ баҕатынан хантыраак баттаһан хос барбыта. Хомойуох иһин анал байыаннай дьайыы толоонугар сырдык тыына быстыбыта. Кини дойду туһугар чиэстээхтик, харса-хабара суох оҥорбут хорсун быһыытын иһин “Хорсунун иһин” мэтээлинэн уонна “Эр санааланыы” уордьанынан наҕараадаламмыта.
Елизавета ТИТОВА