Бүгүн «Күһүҥҥү күн дьаралыга» диэн ийэлэргэ аналлаах тэрээһинИ С.А.Зверев-Кыыл Уолун аатынан норуот айымньытын уораҕайыгар улуустааҕы дьахтар кэмитиэтэ тэрийэн ыытта.
Бу күн чугастааҕы нэһилиэктэртэн кытары далбар хотуттар киирбиттэр. Кэлбит ийэлэргэ, эбэлэргэ тоҕус араас маастар-кылаас ыытылынна. Манна сылдьан үгүһү биллибит, олохпутугар-дьаһахпытыгар туһанарга араас сүбэлэри ыллыбыт.
Холобур, эти-сиини чэбдик сырытыннарарга эрчийэр, быһыыны-таһааны тупсарар латиноамериканскай «Бачата» үҥкүү абылаҥар ийэлэри Ольга Захарова эрчийдэ.
Кириэстээхтэн Федоровтар дьиэ кэргэн Мэйик сириттэн ылыллыбыт туойунан араас оҥоһуктарга маастар-кылаас биэрдилэр.
Оттон Сунтаарга сиригэр-уотугар үүнэр отунан-маһынан арчыланарга, дьиэни-уоту ыраастыырга туттарга, хаһан, хайдах кэмҥэ оту-маһы хомуйуллуохтааҕын туһунан Антонина Степанова тэрийбит маастар-кылааһыгар сылдьан дьон астынна, элбэҕи биллэ-көрдө.
Изабелла Платонова-Сыдьаайа интэриэһинэй кэпсээнин истэ-истэ бэйэбит сирбитигэр үүнэр оттортон чэй амсайдыбыт, кини сүбэтин-соргутун болҕойо иһиттибит.
Сунтаарбыт килиимэтигэр, буоругар сөп түбэһэн ханнык үүнээйилэри олордуохха сөбүн, хайдах харыйылларын туһунан Ньургустана Кычкина, Анастасия Федорова билиһиннэрдилэр, бэйэлэрин тэлгэһэлэригэр хайдах курдук араас оту, маһы үүннэрбиттэрин көрдөрө-көрдөрө кэпсээннэр, үүнээйигэ соччо сыстаҕаһа суох киһи — мин кытары бу күнтэн саҕалаан сибэккини, оту-маһы үүннэриэх курдук буоллум.
Галина Федотова эриэккэс уруһуйдарын быыстапкатын сэргэ, киистэни хайдах тутан, ханнык кыраасканы туһанан уруһуйдууурга бэйэтэ көрдөрөн, үгүс киһи уруһуйдаан, бэйэлэрин үлэлэриттэн астынна.
Аныгы үйэҕэ оҥоһуу өйү туһанан тугу баҕарар саныыргын оҥорторон ыларга, ханнык сыһыарыылары, ВПН туттарга о.д.а. улахан экраҥҥа көрдөрө-көрдөрө Геннадий Иванов кэпсээн, сорохтор сонно тута ойуулуктары, видеолары оҥордулар, хаартыскалары тыыннааҕымсыттылар.
Психолог Татьяна Антипина араас психологическай эрчиллиилэри оҥорторон санаабыт чэпчээтэ.
АБДь кыттыылаахтарын дьиэ кэргэттэригэр ханнык өйөбүл баарын туһунан билиһиннэрии бүгүн эмиэ ыытылынна.
Ону таһынан бэйэ дьыалатынан дьарыктанааччы далбардар бэйэлэрин араас оҥоһуктарын аҕалан атыылаатылар.
Кэмитиэт салайааччыта Александра Иванова бу маннык маастар-кылаастар элбэхтик ыытыллан, дьонтон үөрэнэн, үгүс киһи бэйэтин дьиэ кэргэнигэр эбии дохуот киллэринэр буолла диэн этэр.
Онон бүгүҥҥү тэрээһиҥҥэ биир-биэс харчыта суох киирэн, сылдьан, үгүһү билэн-көрөн, туспутугар туһанан эмиэ буор-босхо, ол эрээри элбэх билии сүгэһэрдээх тарҕастыбыт.
Яина ВЛАСЬЕВА