Бүгүн Дьаархан оскуолатын иһинэн үлэлиир «Тимуровцы 1.0» хамсааһын, салайааччы Владимир Николаев, үтүө дьыаланы оҥорор үлэлэрэ саҕаланна. Урут 9-11 кылаас үөрэнээччилэрэ сылдьар буоллахтарына, биллэр биричиинэнэн оҕо аҕыйаан орто сүһүөх кылааһа киирэн биэрдэ. Ол курдук, быйылгы үөрэх дьылыгар бу хамсааһыҥҥа 8-с кылаас үөрэнээччилэрэ киирэн биэрдилэр.
Тимуровецтарбыт АБДь кыттыылааҕа, бэтэрээнэ, билигин биһиги ортобутугар суох Виктор Аммосов-Сармат соҕотох олорор ийэтигэр Ольга Аммосоваҕа хортуоскатын хостоон күүс-көмө буоллулар. Оҕолор түргэн үлүгэрдик, ыллыы-туойа үлэлээтилэр. Буойун ийэтэ хас да күннээх түбүгүн биир омурҕаҥҥа бүтэрэн Ольга Кирилловна үөрүүтэ муҥура суох. Аҕа саастаах киһиэхэ кыра да болҕомто наада.
Оҕолорбут аны кыһын нэһилиэкпит аҕа саастаахтарыгар, АБДь кыттыылаахтарын дьонноругар муустарын ылыахтара, саһааннарын хайытан сааһылыахтара.
Анна МАРКОВА, Дьаархан