Бэҕэһээ «Сунтаар сонуннара» сайпытыгар «Буруйдаахтары сэмэҕэ тардыллыахтаах» диэн ыстатыйа тахсыбыта. Онно улууспут улахан ыһыаҕар киэһэ дискотека кэмигэр буолбут кэмэлдьи быһыы туһунан суруллубута. Ол курдук, уопсастыбаннай бэрээдэги кэспит уонна тус киһи чиэһин түһэрэр дьайыылары оҥорбут дьахталлары полиция үлэһиттэрэ ирдиир, көрдүүр үлэни ыыта сылдьаллара этиллибитэ. Ирдэбил үлэ түмүгүнэн буруйдаахтар булуллубут, кимнээхтэрэ биллибит. Буруйдаахтар туох сэмэҕэ тардыллыбыттарын Ис дьыала Сунтаардааҕы отделын начальнигын уопсастыбаннай бэрээдэги харыстыырга солбуйааччы Артем Афанасьев бу курдук иһитиннэрдэ:
— Ыһыах бастакы түүнүгэр кэнсиэр-дискотека кэмигэр уопсастыбаннай бэрээдэги кэспит, дьон сынньалаҥар мэһэйдэри үөскэппит, артыыс ыллыы турар кэмигэр кини чиэһин түһэрбит буруйдаахтар көһүннүлэр, кимнээхтэрэ чуолкайданна. Биирдэстэригэр, биллэр биричиинэнэн — доруобуйатын туругунан анал учуокка турарынан, ханнык да миэрэ оҥоһуллубат. Уонна кини билигин улуус тас өттүгэр баара билиннэ. Оттон иккис буруйдаахха сокуонунан көрүллэр харчынан ыстараап түһэрилиннэ. Ону сэргэ уопсастыбаннай бэрээдэги кэһиигэ туох-ханнык миэрэлэр баалларын, инникитин маннык куһаҕан дьайыылары оҥорботун туһугар өйдөтөр үлэ барда. Буруйун толору билинэр.
Дьэ, онон доҕоттор, уопсастыбаннай бэрээдэги кэһии туох да миэрэтэ суох хаалар, бэрээдэги көрөөччүлэр, полициялар үлэлэрин ситэри толорботтор диэн сорох дьон сыыһа өйдүүргүтүн тохтотуҥ. Оннук буолбат. Киһи оҥорбут буруйугар хайаан да эппиэттиир. Инникитин маннык быһыы тахсыбатын туһугар бэйэ бодобутун тардынан сылдьыаҕыҥ.
Яина ВЛАСЬЕВА