Байыаннай дьайыыга сылдьар байыастарга көмөлөһөр “Харысхал” волонтердар түмсүүлэригэр эбии саҥа иистэнэр массыына баар буолла. Маннык бэлэҕи «харысхалларга» байыаннай дьайыы кыттыылааҕа, ыччат миниистирэ Петр Шамаев бэлэх уунна.
“Харысхал” түмсүү кыттааччылара байыаннай дьайыыга сылдьар биир дойдулаахтарбытыгар хаххалыыр сиэккэлэри оҥорон, таҥас-сап арааһын тигэн, байыаннайдарга аадырыстаммыт баһыылкалары, маллары мунньан ыыталлар.
Күннэтэ «харысхаллар» түмсэр балаҕаннарыгар үлэ күөстүү оргуйар. Кэлиҥҥи кэмҥэ тигэр таҥастарын арааһа элбээтэ. Уолаттары кытары быһа сибээһи тутар буоланнар, туохха наадыйалларын чопчу билэ сыталлар. Ол курдук, балыыһаларга госпитальнай таҥас тигэн ыыталлар. Үксүн уолаттар киһи этин уутун оборбот, сылааһы тутар, ардахтан, силбиктэн харыстыыр, түргэнник кэтиллэр таҥаһы үлэһэллэр эбит.
Бадарааҥҥа кэтэр курумуу саппыкы быһыылаах атахха кэтэри былдьаһыгынан үллэстэллэрин истэбит. Байыаннай дьайыы толоонугар сылдьар уолаттар антидроновай харысхал плащ палатканы сакаастаан тиктэрэллэр эбит. Элбэх дьон олоҕун быыһаабыт плащ палатка дрон таба көрбөтүн диэн хас да хос матырыйаалтан турар. Тигиитин анал иистэнэр эрэ массыына кыайар.
Бу саас ыччат миниистирэ Петр Шамаев Сунтаарга сырыытыгар “Харысхал” түмсүү кыттыылаахтарын кытары көрсүбүтэ, үлэлэрин билсибитэ. Кини бэйэтэ анал байыаннай дьайыы кыттыылааҕа буолан, маннык үтүө дьыаланан дьарыктанар түмсүүлэр үлэлэрин олус сэргиир, чугастык ылынар. Үтүө көмөһүттэри (волонтердары) кытары көрсүһүүтүгэр профессиональнай иистэнэр массыынаны бэлэх уунуом диэн мэктиэ тылын биэрбитэ. Бойобуой сырыыны ааспыт, дьиҥнээх эр киһи тылыгар туран, “харысхалларга” иистэнэр массыынаны ыыппытын көрдүбүт.
Номнуо волонтердар саҥа иистэнэр массыынанан харысхал плащ палатканы тигэллэрэ икки бүк түргэтээбит. “Харысхаллар” үтүө санаалаах эдэр киһиэхэ Петр Шамаевка ис-сүрэхтэн махтаналлар.
Күн бүгүн 60 устуука плащ палатканы тигэн байыаннай дьайыы буола турар сиригэр ыытаары бэлэмнээбиттэр.
“Харысхал” түмсүү дьон, норуот көҕүлээһининэн тэриллибит буолан үбүлээһин өттүгэр кэккэ ыарахаттары көрсөр. Олохтоох дьон, урбаанньыттар таҥас тигэр матырыйаалынан, харчынан, аһынан-таҥаһынан көмөлөстөхтөрүнэ үлэ күөстүү оргуйа түһэр.
Хомойуох иһин, бүгүҥҥү көрсүһүүбүтүгэр бүтэһик салаа матырыйаалларынан харысхал плащ-палаткаларын ситэрэ олороллоругар түбэстибит. Иис матырыйаала бүттэҕинэ үлэ тохтоон хаалар диэн “харысхаллар” хараастыбыт санааларын этэллэр. Үтүө санаалаах дьон мэлдьи баар. Ис санааларыттан, дууһаларыттан, биир-биэс хамнаһа суох, үлэлиир далбардарбытын өйүөххэ, көмөлөһүөххэ.
Мира АФАНАСЬЕВА