Бүгүн Сунтаарбыт сиригэр-уотугар «Земля олонхо» чэпчэки атлетикаҕа өрөспүүбүлүкэтээҕи сүүрүү күрэҕэ үрдүк таһымҥа буола турар.
Үбүлүөйдээх сылга анаммыт биир бастыҥ, чаҕылхай спортивнай тэрээһин ыраахтан-чугастан үгүс спортсменнары түмэ тарта. Ол курдук, идэтийбит бэтэрээн спортсменнары сэргэ, маассабай сүүрүүнү таптааччылар эдэриттэн эмэнигэр тиийэ кэлэн, 300-тэн тахса буолан кытта сылдьаллар.
Үөрүүлээх тэрээһиҥҥэ СӨ үп миниистирин эбээһинэһин толорооччу Иван Алексеев бэйэтинэн кэлэн кыттыыны ыла сылдьар. Бэлиэтээн этэр эбит буоллахха, бу тэрээһин СӨ Үп министиэристибэтин иһинэн олохтоох көҕүлээһиннэри өйүүр бырагыраама (ППМИ) чэрчитинэн ыытыллар.
Тустаах бырагыраама Саха сиригэр үлэлээбитэ 10-с сылын бэлиэтиир.
Эрдэ сылларга олохтоох көҕүлээһини өйүүр бырагыраама ордук нэһилиэнньэлээх пууннар тас көрүҥүнэрин тупсарыыга үлэлиир эбит буоллаҕына, былырыыҥҥы сылтан эбии физическай култуураны өйүүр маассабай тэрээһини киллэрэн биэрбиппит, — диэн Иван Алексеев этэн аһарда.
Бу курдук спортивнай тэрээһин өрөспүүбүлүкэ улуустарыттан, аан маҥнай Сунтаарга тэриллиннэ. Улахан таһымнаах тэрээһини миниистр эбээһинэһин толорооччу Иван Алексеев, улуус баһылыгын социальнай имиджевай политикаҕа солбуйааччы Мирослав Иванов, Сунтаар нэһилгин баһылыга Эдуард Филиппов эҕэрдэ тылларынан арыйдылар.
Маны тэҥэ, олохторун спорт эйгэтигэр анаабыт ытык дьоммут, бэтэрээн спортсменнарбыт Сунтаар улууһун былааҕын өрө күөрэттилэр.
Өрөспүүбүлүкэ таһымнаах тэрээһини Марфа Троева салайааччылаах «Сулус спорт» уопсастыбаннай тэрилтэ ылсан, сүрүн күүс-көмө буолла. Кыттааччылар стартовай набордара уонна мэдээллэрэ ураты оҥоһуулааҕын бэлиэтиир эмиэ тоҕоостоох.
Бу курдук, олохтоох көҕүлээһини өйүүр бырагыраама тупсаҕай эйгэни тэрийиигэ эрэ буолбакка, дьон-сэргэ чөл олоҕу өрө тутарыгар, маассабай спорт сайдарыгар төһүү күүс буолар.
Елизавета ТИТОВА