Улуу Кыайыы өрөгөйдөөх бырааһынньыгын күнүгэр үгэс буолбут улууспут хаһыатын бирииһигэр сүүрүүгэ биһиги, Дьаархан нэһилиэгин ыччаттара, ааспыт сылларга көхтөөхтүк кыттар этибит. Ол номнуо 20 сыл ааһа охсубут эбит. Хаһыат бирииһигэр сүүрүүгэ биһиги хамаандабыт 3 сыл субуруччу (2005-2007 сс.) кыайан, көһө сылдьар кубогы ылбыппытыттан билигин даҕаны киэн туттабыт. Ону таһынан биир сыллаах хаһыакка сурутуу бириистээх этэ. Кыайыылаах хамаандаҕа туттарыллыбыт ол саҕанааҕы Чорооммут билигин да дьаһалтабыт дьиэтигэр бэлиэ сиргэ ууруллан турара астык.
Ол саҕана Октябрьскай уулуссанан сүүрэрбит, биэтэк улуус дьаһалтатын иннигэр этэ. Элбэх хамаанда кыттара, арыт ардахтаах, арыт хаардаах күн буолара, ону ол диэбэккэ күрэхтэһиибит син биир ыытыллара. Кыттааччы оҕо да, улахан да киһи элбэх буолара. Онон бэрт тыҥааһыннаах күрэхтэһии ыытыллара.
Оскуолаҕа үөрэнэр кэмнэрбитигэр Сунтаар улууһун чэпчэки атлетикаҕа сүүмэрдэммит хамаандатыгар баар этибит. Тириэньэрбит Александр Неустроев дьарыктаан өрөспүүбүлүкэҕэ миэстэлэһэрбит. Мэлдьи Сунтаар нэһилиэгин хамаандатын кытары илин-кэлин түсүһэрбит. Сунтаар нэһилиэгэр сүүрүүгэ тириэньэр Сергей Докторов эстафетаҕа күүстээх хамаанданы туруорар этэ да, биҺиги кыайарбыт.
Билигин нэһилиэктэртэн кыайан киирэн кыттыбаппыт кыһыылаах. Бу билиҥҥи кэмҥэ үп-харчы да суоҕа, тиэхиньикэ да көстөрө ыарахаттардааҕа сүрүн кыһалҕабыт. Ол эрээри, Сунтаарга олорор ыччаттар, тэрилтэлэр сүүрүүгэ көхтөөхтүк кыттыахтара дии саныыбын.
Анна МАРКОВА, Дьаархан
Хаартыскаҕа: Дьаархан 2007 с. сүүмэрдэммит хамаандатын чилиэннэрэ – Анна Маркова, Мария Тихонова уонна хамаанда хапытаана Василий Васильев.