Лилия, Николай Григорьевтар дьиэ кэргэҥҥэ 1998 с. тохсунньу 17 күнүгэр төрдүс оҕо күн сирин көрөр. Ол саҕанан Григорьевтар Мииринэй куоракка бааллара. Саҥа төрөөбүт оҕолорун аҕатын аатынан Николай дииллэр.
Коля оҕо сааһа Сунтаар Уһун Күөлүгэр уонна Туойдааҕар ааһар. Уол кыра эрдэҕиттэн бэйэтин кыанара, доҕотторугар мэлдьи кыаллары барытын көмөлөһө сылдьар аһыныгас сүрэхтээҕэ. Төрөппүттэригэр, саастаах аймахтарыгар ураты истиҥ сыһыаннааҕа, кинилэри мэлдьи үөрдэ-көтүтэ сылдьара, кинилэргэ тапталын үлэнэн, үөрэҕинэн биллэрэрэ.
Оскуолаҕа үөрэнэ сылдьан успуордунан утумнаахтык дьарыктаммыта. Ол курдук, тустууну уонна буоксаны сэҥээрэн күүскэ дьарыктаммыта. Ол түмүгэр үгүс күрэхтэһиилэргэ чугаһынан-ырааҕынан сылдьан кыайыы көтөллөөх кэлэрэ, бу кыайыытын дьонугар аныыра.
Бэрт эдэр сааһыгар тапталын Ленаны көрсөн, ыал буолар. Икки кыыс оҕо тапталлаах аҕата. Эдэр ыал Сунтаарга көһөн киирэн, ыал аҕата үлэлии-хамсыы сырыттаҕына, 2022 с. анал байыаннай дьайыыга хомуурга бэбиэскэ тутан онно суһаллык барар. АБДь эвакуационнай этэрээккэ хамандыырдыыр.
Хорсун, дойдуга тапталы оҕо эрдэҕиттэн сүрэҕэр иҥэриммит эдэркээн уол байыаннай дьайыы буола турар сиригэр хорсун бойобуой быһыылары көрдөрөр. Дойдутун туһугар хорсуннук сэриилэһэ сылдьан 2025 с. баара-суоҕа 27 сааһыгар сырдык тыына быстаахтыыр.
Николай Григорьев байыаннай дьайыы бэтэрээнэ, байыаннай эбээһинэһи толорууга хорсун быһыытын, бэриниилээх буолуутун иһин «Байыаннай килбиэн» II истиэпэннээх мэтээллээх, «Хорсун быһыытын иһин» уордьаннаах, «Участник военной операции в Сирии», «За участие в военном параде в день Победы» мэтээллэрдээх.
Сунтаарга аан бастакытын хорсун буойун, талааннаах спортсмен сырдык аатын үйэтитэн буоксаҕа өрөспүүбүлүкэтээҕи турнир буола турар. Бу турнирга 2011-2012 сс. уонна 2013-2014 сс. төрүөх уолаттар алта улуустан кэлэн А.И.Иванов аатынан олимпийскай эрэллэри бэлэмниир спортивнай оскуола манеһыгар рингэҕэ күөн көрсө сылдьаллар. Турнир 3 күн устата буолуоҕа. Ол курдук, Ленскэй, Ньурба, Үөһээ Бүлүү, Дьокуускай, Хатас уонна Сунтаар эдэр боксердара, уопсайа 73 уол рингэҕэ 16 ыйааһыҥҥа күөн көрсөллөр.
Бүгүн турнир кыттыылаахтарын параадын кэмигэр Николай бойобуой олоҕуттан тэттик киинэ устубуттарын эдэр боксердар, успуорт бу көрүҥүн сэҥээрээччилэр уйадыйа көрдүлэр. Хорсун буойун төрөппүттэрэ Лилия, Николай Григорьевтар, кэргэнэ Елена Григорьева кэлэн эдэр спортсменнарга ситиһиини, кыайыыны баҕардылар, бу тэрээһини иилээн-саҕалаан ыытар тэрийээччилэргэ махталларын эттилэр.
Күрэхтэһии кылаабынай судьуйата, боксаҕа улуус старшай тириэньэрэ Игорь Ефимов маннык күрэхтэһиини аны сыл аайы ыытарга үлэни ыытыахпыт диэн иһитиннэрдэ.
Яина ВЛАСЬЕВА