Ол курдук, ыам ыйын 23 күнүгэр Сунтаар улууһугар иккис төгүлүн ыытыллар саха төрүт оҕунан хамаанданан ытыыга — «Битва выпускников» күөн күрэскэ кэлэн кыттаргытыгар, бэйэҕитин холонон көрөргүтүгэр ыҥырабыт. Күөн күрэс «Алмаз» стадиоҥҥа буолар.
Хамаандаҕа 2 эр киһи, 2 дьахтар биир сылга орто үөрэхтээһин оскуолатын араас кэмнэргэ, улуустарга бүтэрбит, Сунтаар улууһугар олорор, үлэлиир дьон киирэн кыттар.
Быйылгы күрэс уратыта — сайыҥҥы дистанцияҕа ытыы буолар. Ол эбэтэр, эр дьон 40, дьахталлар 30 миэтэрэттэн ытыахтара. Хамаанда ытааччылара бары ылбыт табыыларын очукуотунан кыайыылаах үс бастыҥ хамаанда биллиэҕэ. Бастаабыт хамаанда Сунтаар улууһун саха төрүт оҕунан ытыы федерациятын (сал. Артем Яковлев) көһө сылдьар Кубогын күөрэччи көтөҕүөҕэ.
Былырыын бу күөн күрэскэ сэттэ хамаанда кыттыбыта. Кыайыылаахтарынан 1989 сыллаах выпуск хамаандата буолан кыайыы өрөгөйүн билбиттэрэ. Дьэ, быйыл кимнээх буолаллар?
Павел КЫРЕЛОВ
Хаартыска ааптар дьиэтээҕи архыыбыттан