АБДь бэтэрээнэ, кыайыы иһин бэйэтин харыстаммакка кыргыспыт, дойдуга эйэлээх, нус-хас олох иһин сырдык тыынын толук уурбут биир дойдулаахпыт Николай Григорьев кэриэһигэр Сунтаарга өрөспүүбүлүкэтээҕи бокса турнира уолаттарга ыытылынна. Түөрт күннээх тыҥааһыннаах киирсиилээх, доҕордоһуу түһүлгэлээх бокса күрэхтэһиитигэр 6 улуустан барыта 74 эдэр боксер кэлэн кииристэ. 12 саастарыттан 15-гэр диэри саастаах уолаттар киирсиилэрин успуорт бу көрүҥүн сэҥээрээччилэр дуоһуйа, астына көрдүлэр. Кинилэр ортолоругар успуорт бэтэрээнэ, боксаҕа маастарга хандьыдаат 92 сааһыгар сылдьар Яков Васильев күрэхтэһии саҕаланыаҕыттан бүтүөр диэри сылдьан көрдө. «Тэрээһин олус бэрт. Уолаттар да бэлэмнэрэ, дьарыктара үчүгэй, таһымнаах диэн бэлиэтии көрдүм. Оҕолор маладьыастар», — диэн санаатын үллэстэр.
Бу күрэхтэһии кэнниттэн Николай төрөппүттэрэ Лилия, Николай Григорьевтар тэрийээччилэргэ, эдэр спортсменнарга, успуонсардарга истиҥник махтаннылар. Уолбут сырдык аатыгар ыытыллар бу маннык тэрээһин тиһигин быспакка ыытыллара буоллар диэн баҕа санааларын эттилэр.
Күрэхтэһии буолан баран, ким эрэ кыайыы-хотуу өрөгөйүн билэн, ким эрэ кыайтарыы кыһыытын, хомолтотун билэн тарҕаһар, бэйэлэригэр сыал оҥостон, өссө күүскэ дьарыктанарга сорук туруоруналлар.
Уолаттар саастарынан 34,36, 38, 40, 44, 46, 48, 52, 54, 57, 66 киилэ ыйааһыннарга кииристилэр. Чөмпүйүөннэргэ Николай Григорьев мөссүөннээх чөмпүйүөн кура, мэтээл туттарылынна, ону сэргэ уу харчынан бириэмийэ олохтоммут. Бириистээх, бочуоттаах миэстэлэри ылбыттар эмиэ мэтээл, бириис тутан үөрдүлэр. Хас биирдии ыйааһыҥҥа кимнээх миэстэлэспиттэрин суруйа барбакка, улуустарынан хас мэтээллээх күрэхтэһиини түмүктээбиттэрин билиһиннэриим. Ол курдук, Ньурба улууһун хамаандата 5 кыһыл, 7 үрүҥ, 14 боруонса мэтээллээхтэр. Үөһээ Бүлүүлэр 2 кыһыл, 2 үрүҥ, 5 боруонса, Ленскэй улууһа 3 кыһыл мэтээли кэттилэр. Хатас эдэр боксердара уопсайа биэс мэтээллээхтэр, ол иһигэр 2 кыһыл, 1 үрүҥ, 2 боруонса. Дьокуускайдааҕы спортивнай оскуолатын иитиллээччилэрэ 2 кыһыл, 1 үрүҥ, 1 боруонса мэтээли ситистилэр. Сунтаар улууһун боксердара уопсайа 13 мэтээллээхтэр, ол иһигэр 2 кыһыл, 5 үрүҥ, 6 боруонса.
Күрэхтэһии үрдүк таһымҥа барарыгар манеж үлэһиттэриттэн саҕалаан, тириэньэрдэр, судьуйалар, тэрийээччилэр бары кыһаллан үлэлээбиттэрэ көстөр. Бириис, бэлэх-туһах булуута билиҥҥи кэмҥэ уустуктардааҕа биллэр. Ол эрээри, успуорт сайдыытыгар сүрэхтэринэн-быардарынан «ыалдьар», кыһаллар дьон мэлдьи баар буолар. Николай төрөппүттэрэ, дьиэ кэргэнэ, тэрийээччилэр, спортсменнар бириистэри туруоран успуонсардаабыт тэрилтэлэргэ, биирдиилээн дьоҥҥо махтаналлар. Ол курдук, Арассыыйа Дьоруойдара Филипп Евсеев, Родимир Максимов – Бурхат, Сунтаардааҕы АБДь бэтэрээннэрин ассоциацията, Петр Олесов салайааччылаах «Геометрия» тутуу хампаанньата (Дьокуускай), Сунтаардааҕы авиалесоохрана, «Авторитет» тэрилтэлэрэ, Николай аҕата Николай Николаевич бииргэ сулууспалаабыт доҕотторо, ийэтэ Лилия Леонидовна бииргэ үөрэммиттэрэ, улуус дьаһалтата олус үчүгэй, сыаналаах бириистэри туруордулар.
«Байыаннай килбиэн» II истиэпэннээх мэтээллээх, «Хорсун быһыытын иһин» уордьаннаах, «Участник военной операции в Сирии», «За участие в военном параде в день Победы» мэтээллэрдээх, боксаҕа уолаттарга өрөспүүбүлүкэ чөмпүйүөнэ, араас таһымнаах күрэхтэһиилэр кыттыылааҕа, призера биир дойдулаахпыт Николай Григорьев сырдык аата умнуллуо суоҕа.
Яина ВЛАСЬЕВА
Георгий Афанасьев хаартыскаҕа түһэриитэ.