Арассыыйа бары муннуктарыттан тыа хаһаайыстыбатынан дьарыктанар тэрилтэлэр, уопсайа 700 араас көрүҥүнэн бар дьонун аһатан олорор хаһаайыстыбалар, Москваҕа «Көмүс күһүн» быыстапкалара ыытылынна. Биһиги бэйэбит бородууксуйабытынан кыттыахха сөп эбит диэн Күндэйэттэн Алина Львова салайааччылаах «Сырдык Аартык» ТХПК бородууксуйатынан баран үрдүк ситиһиилээхтик кытынна. Бу сүрдээх улахан 28-с сылын Арассыыйаҕа күһүн аайы ыытыллар быыстапкаҕа ситиһиилээхтик кыттыбыттарын икки күн куйаар нөҥүө көрөн олус үөрүүбүт үрдээтэ.
Ол курдук, тыа сирэ сүөһүтүн эспэккэ, кэтэх хаһаайыстыбаны өйөөн кээпэрэтиип тэрийэн дьоһун үлэни саҕалаабыттарын туоһутунан «Сырдык Аартык» Кыһыл көмүс мэтээлинэн наҕараадаланар чиэскэ тиийдэ. Аны үүт, арыы анаалыһа биллэн дьүүллүүр сүбэ биир санаанан бу ыраах сытар Саха сирин кыра бөһүөлэгэр Сергей Еремеев салайааччылаах үүт, арыы оҥорор «Тускул» сыах кэлэктиибэ Арассыыйа боруонса мэтээлинэн наҕараадаламмытын туһунан сонуну истэммит сүөм үрдээтибит, үлэһит дьоммутунан киэн тутуннубут, кинилэрдиин тэҥҥэ үөрдүбүт. Дьэ хайдах курдук истиэххэ үчүгэйий. Күндэйэбит үүт, эт аһылыга бүтүн Арассыыйа билиннэ!
Маннык үрдүк ситиһии нэһилиэкпит сүөһү, сылгы ииттэн олорор хаһаайыстыбалар кыттыгастаах өрөгөй күннэрэ, онон барыбыт үөрүүтэ буолар. Эһиил өссө ситиһиилээхтик кыттыахтара, тыа сирэ сүөһүтүн эспэккэ олордоҕуна дьолбут, инники олохпут туруктаах, сайдыы өссө бара туруо диэн, Күндэйэбит үлэһит дьонноругар, Олимпьевна тэрийбит «Сырдык Аартыгын» суола куруук сырдыгынан сыдьаайдын, арылыйа сырдаатын!
Феврония НИКОЛАЕВА