Бу аҕыйах хонуктааҕыта Сунтаардааҕы оҕо ускуустубатын оскуолатын иһинэн тэриллибит оҕолор вокальнай-инструментальнай ансаамбылларын уонна рок бөлөхтөр күүстэринэн тэриллибит «Бары бииргэ!» аһымал кэнсиэр Сэргэй Сибиэрэп-Кыыл Уолун аатынан улуустааҕы норуот айымньытын киинигэр үрдүк таһымнаахтык ыытылынна. Бу киэһэ тыыннаах дорҕоону сэргээччилэр, сэҥээрээччилэр мустан кэнсиэрди биир тыынынан көрдүлэр. Манна рок-бөлөхтөр — «Хаһыы» (салайааччы – Андрей Пахомов), “Һөҕүҥ” (салайааччы – Владимир Константинов); оҕолор бөлөхтөрө — «Харысхал”, “Алтын Куо”, “AYAR KUT”,“Гост” (салайааччы — Константинов В.В.) кытыннылар.
Тыыннаах дорҕоон доҕуһуоллаах араас ааптардар ырыалара ылланнылар.Ол курдук, Кэскил Баишев, Лэкиэс, «Хардыы” бөлөх ырыаларын “Һөҕүҥ” бөлөх, аан дойдуга киэҥник биллибит “Paranoid” бөлөх “Black Sabbath” ырыатын “ГОСТ” уолаттар бөлөхтөрө, Саха сирин биллиилээх ырыаһыттарын ырыаларын «Алтын Куо», “Ayar Kut” ыллаатылар. Бу киэьэ, саҥардыы тэриллэн, икки ый кэриэтэ эрэ дьарыктаммыт «Харысхал» оҕо бөлөҕө аан маҥнайгытын бэрт эрэллээхтик сценаҕа таҕыста. Муусука кэрэ эйгэтигэр оҕолору уһуйар үлэҕэ баай уопуттаах, оҕолор ВИА-ларын салайааччылара Владимир Константинов эдэр муусукааннары кэнсиэркэ бэлэмнээн, сүргэлэрин көтөҕөн кытыннартаата.
Сунтаардааҕы оҕо ускуустубатын оскуолатын хор кылааһын уһуйааччыта Юлия Филиппова бэйэтин тылларыгар уонна матыыбыгар суруйбут “Баҕа санаа” саҥа ырыата аан маҥнайгытын сүрэхтэннэ, Августина Лонкунова тылларыгар “Эргиллэн да көрбөтүҥ”, Римма Васильева тылларыгар “Соҕотох ыйдаҥа» диэн ырыалары бэйэтин матыыбыгар, «Хаһыы» бөлөх доҕуһуолунан толорон дьон-сэргэ биһирэбилин ылла.
90-с сылларга саха рок бөлөхтөрүттэн Сиэн Тиитэп салайааччылаах “Айтал” вокальнай-инструментальнай ансаамбыл саха ураты ырыатын киэҥ сиринэн тарҕатан үгүс сүгүрүйээччилэммитэ. Сиэн Тиитэп үөрэнээччитэ Анатолий Пахомов 2021 сылтан “Хаһыы” рок бөлөх тэрийэн, өрөспүүбүлүкэҕэ биир үрдүк таһымнаах, туспа суоллаах-иистээх бөлөх буолан көстөн-биллэн эрэллэр. Анатолий Рашидович 2017 сыллаахха М.Н. Жирков аатынан музыкальнай колледжы бүтэрэн, “артыыс, преподаватель, эстраднай оркестр салайааччыта” диэн идэни толору баһылаан, үөрэммит Сунтаардааҕы оҕо ускуустубатын оскуолатыгар эбии үөрэхтээһин уһуйааччытынан үлэлии-хамныы кэлбитэ. Гитара кылааһыгар барыта 25 оҕо утумнаахтык дьарыктанар. Айар үлэҕэ оҕолорго тус бэйэтинэн үтүө холобур буолар уһуйааччы.
Анатолий Пахомов: — Бастатан туран, «Хаһыы» рок бөлөх састаабын кытта билиһиннэриэхпин баҕарабын: римт гитараҕа — Арнольд Ордахов, бас гитараҕа — Владимир Константинов, клавишнай инструмеҥҥа — Нюргун Данилов, ударнайга -Юрий Иванов уонна соло гитараҕа бэйэм буолан биир ситимнээхтик оонньуубут. Биллиилээх “Чолбон” рок бөлөх элбэх ырыатын ааптара Тумус Мэхээлэ хоһооннорун тыла миэхэ ордук чугастар, ол иһин кини тылларыгар, бэйэм матыыппар ырыа айабын. Бу кэнсиэркэ “Этэр эҥин санаам”, “Киһи күннээх”, “Хаһан ханна да буоллун”, “Билэр билбэт” , “Санаабар ыттаммын” диэн ырыалары толордум.
Владимир Константинов: — Оҕолору сиэрдээх быһыыга-майгыга иитиигэ, амарах, аһыныгас санаалаах буоларга бу аһымал кэнсиэр суолтата олус улахан. Төрөппүттэрбэр күүс-көмө буолалларыгар, оҕолорун сайдыыларыгар, муусука кэрэ алыбыгар тус кылааттарын киллэрэ сылдьалларыгар махтанабын.
Кэнсиэртэн киирбит үп-харчы баһаартан эмсэҕэлээбит элбэх оҕолоох Семеновтар дьиэ кэргэҥҥэ туттарылынна.
Надежда ЯКОВЛЕВА, Сунтаардааҕы оҕо ускуустубатын оскуолатын дириэктэри иитэр үлэҕэ солбуйааччы