Бэҕэһээ Куокуну Улахан Табаҕатыгар олус сэргэх «День Поля-2023» өрөспүүбүлүкэтээҕи мэхэньисээтэрдэр (тырахтарыыстар) күрэхтэрэ буолан ааста.
Манна барыта 7 хамаанда кыттыыны ылла («Кириэстээх» ТХПК, «Семенов К.К.» ИП бааһынай хаһаайыстыбата (Горнай улууһа), «Тойбохой» ТХПК, «А.Н. Тихонов» ИП (Ньурба улууһа), «В.С. Петров» ИП (Чурапчы улууһа), «Н.Н. Гаврильев» (Куокуну), «Н.А. Иванов» ИП (Күндэйэ).
Күрэх түөрт түһүмэхтэн турда. Бастакы түһүмэххэ тиэхиньикэни тиэстээтилэр.
Дьэ ол кэннэ күрэх көҕө, ыгылыйыылаах, мүччүргэннээх түгэнэ II-с түһүмэхтэн — «Управление змейкой (с навеской)» саҕаланна. Кыттааччылар бэйэлэрэ этэллэринэн, «снайпердар күрэхтэрэ». Соруга — кыттааччылар тыраахтар кэннигэр ыйаммыт тимир навесканы кыра кээмэйдээх сыалга оруобуна сөп түбэһэрин курдук таба ууруохтаахтар. Көрдөххө, 1-2 эрэ кыттааччы туруоруллубут сыалын ситтэ. Манна кыайыылааҕынан 4 мүн.06 сөк. 01 суот. бириэмэни көрдөрөн, Горнай бэрэстэбиитэлэ Харитон Семенов хотто.
III-с түһүмэх «Уложение бревна на чурки (упражнение с погрузчиком) диэн. Акылаакка бэрэбинэни сөпкө, сатабыллаахтык ууруу. Бэйэтин маастарыстыбатынан уонна уопутунан да бу түһүмэххэ кыайыылааҕынан Күндэйэ хамаандатын чилиэнэ Дмитрий Степанов буолла.
Күрэх түмүктүүр түһүмэҕэ — «Заезд в гараж (упражнение с цистерной). Манна кыттааччылар цистерна иилинэн баран кыра иэннээх сиринэн иннинэн, кэннинэн бириэмэҕэ айаннаатылар. Бу сорудаҕы үгүстэр ыарырҕаттылар. Үксүлэрэ кэннинэн ыытан барыыны уустугуртулар. Көрөргө олус интэриэһинэй. Көрөөччүлэр бэйэлэрин дьонугар ыалдьан да биэрдилэр. Ыһыы-хаһыы да баар буолла. Сытыы киирсии түмүгүнэн бу түһүмэх кыайыылааҕынан Владимир Евсеев (Күндэйэ) таҕыста.
Оттон күрэх бары түһүмэхтэрин түмүгүнэн, бочуоттаах III-с миэстэҕэ Чурапчы улууһун хамаандата («Петров В.С.» ИП) тахсан, 200 тыһ. солк. суумалаах сертификаты тутта. II-с м Горнай улууһун хамаандата («Семенов Х.Х.» ИП) ылан, 300 тыһ. солк. наҕараадаланна.
Тэрээһин биир саамай долгутуулаах түгэнинэн тэрийээччилэр сүбэлэһэн баран, Куокуну агрооскуолатын хамаандатыгар мини- тыраахтары бэлэхтээбиттэрэ буолла. Кинилэргэ саамай туһалаах тиэхиньикэ буоларын бары өйдүүбүт уонна бу быһаарыыны олус биһирээтибит.
Оттон «День Поля-2023» муҥутуур кыайыылааҕынан буолла уонна 500 тыһ. солк. суумалаах сертификатынан наҕараадаланна — Күндэйэ хамаандата («Иванов Н.А.» ИП). Кыайыылаахтары ааҕааччыларбыт аатыттан итиитик-истиҥник эҕэрдэлиибит!
Маны таһынан анал ааттар иҥэрилиннилэр: «Эдэр тырахтарыыс» аат Владимир Евсеевкэ (Күндэйэ), «Кыайыыга дьулуурун иһин» Тимур Акимов («Кириэстээх» ТХПК), «Саамай түргэн сырыылаах» Афанасий Хоютанов (Чурапчы улууһа) уо.д.а.
Тэрээһини СӨ Тыатын хаһаайыстыбатын министиэристибэтэ тэрийэн ыытта. Күрэх өрөспүүбүлүкэҕэ биллэриллибит Үлэ сылыгар ананна.
Күрэҕи сабар түмүк тылыгар улуус баһылыга Анатолий Григорьев:
Тэрийээччилэр, кыттааччылар сүбэлэһэн баран, маннык күрэҕи улууспутугар сыллата ыытар буолуоҕуҥ диэн биир санааҕа кэллибит,»
— диэн мустубут дьон сүргэлэрин көтөхтө. Онон аныгыскы сылга көрсүөххэ диэри!
Гаврил АНДРЕЕВ.