Билигин олохпут оҥкула уларыйан иһэр — уу, аһыыр аһылык аҕалыыттан саҕалаан араас үлэни толорор өҥөлөр баар буолбуттара ордук кырдьаҕас кыаммат дьону абырыыр. Онтон эдэр эрчимнээх ыччаттар күнү таах бараабакка дьоҥҥо, бэйэлэригэр да туһалаахтык, махталлаахтык, үлэҕэ эриллэн, кииллийэн, дьону үөрдэн, дьон махталын ылан олоҕу киэргэтэллэрэ олус үөрүүлээх.
Мин биир маннык оҕону кэпсиэхпин баҕарабын. Михайлов Дима диэн быйыл Сунтаар 1 №-дээх оскуолатын 10-с кылааһын бүтэрбит уол. Кини уһаайбам уһуу сатаан баран атахха эриллэр буолбут отун, хаһан да ыраастамматаҕын ыраастаан, отун уулаах, кыбычыын даҕаны сирдэрбин ордорбокко охсон нэлэһитэн кэбистэ. Урукку улуу охсооччулар итини ыл, маны тутан тур, итиннэ киирбэппин, манан барбаппын диэн ууга-уокка түһэрээччилэр.
Уол былырыыҥҥыттан маннык дьарыктанар эбит. Бастаан харчы наада буолбута, бу үлэлээн ылар харчыбын мунньабын. Таҥас, үөрэх тэрилэ ыларбар туттабын диэн лоп бааччы кэпсээтэ. Үлэлии үөрэммитэ туттуутугар-хаптыытыгар, быһыытыгар-таһаатыгар да көстөр. Көстөр ыраас көрүҥүн курдук охсон нэлэһиппит сирэ ырааһа олох санаам иһинэн ааста. Өбүгэлэрбит кыыс да, уол да төһө ыраастык тутталларыттан, үлэлииллэриттэн кэнэҕэски кэргэттэрэ, олохторо хайдах буолуоҕун төлкөлүүллэрэ. Ол кырдьык буолан Дима үөрэхтэнэн, үлэлэнэн, кэрэ, чэбэр кыыһы көрсөн дьон махталынан кынаттанан дьоллоох олохтонуо.
Илиинэн үлэлии үөрэммит оҕо үлэҕэ буһан-хатан олоххо бэлэмнээх буолар, хайдах да түгэҥҥэ иннин солоно сылдьыа. Хата түгэнинэн туһанан, уолбун угуйуктуу да таарыйа, кинини ыҥыран тэлгэһэҕит отун оҕустарыҥ диэн төлөпүөнүн нүөмэрин биэрэбин – 89148209428.
Бу курдук ыччаттарбыт күннээҕи олохтон саҕалаан үтүөнү оҥороннор, дьон махталын ыланнар уһун уйгулаах олохтонуҥ!
Зинаида ФЕДОТОВА-Дьол Кыыма