Бүгүн, сэтинньи 30 күнүгэр, «Партизан» НАТК Сунтаар нэһилиэгин дьаһалтата бу сылга ыыппыт үлэтин отчуотун туруорда. Сүрүн дакылааты баһылык Эдуард Филиппов оҥордо. Эдуард Егорович сыл устата туох-ханнык үлэлэр барбыттарын салаа-салаанан арааран судургутук кэпсээтэ. Бу сылга сиппэтэх үлэлэри, толкуйдаммыт былааннары кэлэр өттүгэр ситэрэн-хоторон олоххо киллэрэргэ ханнык-туох үлэлэр бара туралларын билиһиннэрдэ. Отчуот сиһилии биһиги хаһыаппыт саайтыгар бүгүн таҕыста, ону бу сигэнэн киирэн ааҕыаххытын сөп: https://сунтаарсонуннара.рф/suntaar-nehiliege-municzipalnaj-terillii-dahaltatyn-2023-sylga-yyppyt-yletin-otchuota/
Дакылааты истэн баран, мунньахха кэлбит нэһилиэк олохтоохторо ыйытыыларын биэрдилэр. Олохтоохтор ордук, «Хаарбах дьиэттэн көһөрүү» федеральнай бырагырааманан киирбит дьиэлэргэ өйдөммөт, быһаарылла илик боппуруостар тула ыйытыылары биэрдилэр. Холобур, ааспыт өттүгэр тутуллан киирбит элбэх кыбартыыралаах дьиэлэргэ, чуолаан Октябрьскай уулуссаҕа турар 5 этээстээх дьиэ олохтоохторо төлөбүргэ өйдөспөт быһыы тахсыбытын, маны быһаарсарга туох үлэ барарын ыйыталлар. Управляющай хампаанньа үлэтигэр эмиэ ыйытыы баар буолла. Манна баһылык кэлэр нэдиэлэҕэ олохтоохтору, бу дьиэни итиинэн хааччыйар, көрөр-истэр, тутууну ыыппыт тэрилтэ салайааччыларын мунньан бары уопсай мунньах тэрийэн быһаарсыахха диэтэ. Манна баһылык бу этиллибит дьиэ олохтоохторо бары кэлэн көхтөөх кыттыыны ыллаххытына, тахсыбыт боппуруоска сөптөөх быһаарыы ылылларыгар көдьүүстээҕин эттэ.
С.А.Зверев проспегынан суол кытыытынан уу барар турбалара сатамньыта суохтук сыталлар, онон бу диэки олороччулар саас ууга барабыт диэн туран, манна туох үлэ барыаҕын ыйыттылар. Сунтаар нэһилиэгэр автобус сырыытын туруорсаллар, хаһан эбии автобус кэлиэҕин интэриэһиргииллэр. Абаҕа микроройуонугар тутулла турар КСК дьылҕатын кытары хаарыйдылар. Уопсастыбаннай баанньык хаһан үлэлиирин, нэһилиэк иһигэр суоллары аспааллааһын салгыы барыа дуо, өрөмүөннээһин, суол кытыыларын ыраастааһын, «Хаарбах дьиэттэн дьону көһөрүү» бырагыраама хас сылга диэри барарын ыйыттылар. Хаарбах дьиэттэн дьону көһөрүүгэ үлэлэһэр олохтоох дьаһалта исписэлииһэ Валентина Хастырова дьон ыйытыытыгар лоп-бааччы эппиэттэри биэрдэ. Оттон нэһилиэк баһылыгын үлэтин отчуотугар улуус дьаһалтатыттан баһылыгы экономическай сайдыыга уонна стратегическай былааннааһыҥҥа солбуйааччы Борис Васильев кытынна уонна улуус таһымнаах ыйытыыга эмиэ эппиэт биэрдэ.
Бүгүн тоҕо эрэ бэйдиэ сылдьар ыт боппуруоһугар улаханнык токкоолоһон ыйыппатылар. Манна Эдуард Егорович дакылаатыгар кылгас кэмҥэ ыты тутар пуун үлэтэ бүтэн, кэлэр нэдиэлэттэн үлэтин саҕалыаҕа диэн иһитиннэрбитинэн дуоһуйдулар быһылаах. Ол эрээри эмиэ да сөп курдук, уулуссаҕа бэйдиэ сылдьар ыт үгүстэрэ хаһаайыннаах курдук, моойторуктарыттан көрдөххө. Ыттаах ыалларга рейдэ бара турарын истэбит, манна тустаах уорганнар нэһилиэнньэҕэ төһө ыстараап олохтоммутун туһунан иһитиннэрии биэрэллэрэ наада диэн этиннилэр.
Отчуоту дьүүллэһиигэ, кэпсэтиигэ кыттыбыт дьон Эдуард Егорович уонна кини хамаандата бу сыл устата элбэх үлэ барбытын бэлиэтээтилэр.
Түмүккэ, кэпсэтиигэ кыттыбыт нэһилиэк ытыктанар олохтооҕо Зинаида Иванова «дьиэҕэ олорооччу биэнсийэлээхтэр бассаабынан сонуну истэбит. Үлэҕэ-хамнаска кыттыспат дьон үлэ барбат диэн мөҕүттэллэрин тохтотон, нэһилиэккэ буолар субуотунньукка, култуурунай тэрээһиннэргэ көхтөөхтүк кыттыаҕыҥ» диэн этэринии нэһилиэк үлэтин-хамнаһын сыаналыы, санааны, бэйэ толкуйун этинэ маннык мунньахтарга хото кэлэр ордук буолуо эбит. Сүбэбитин холбоотохпутуна тугу баҕарар кыайар күүс буолабыт. Баҕар бүгүн мунньах ыытыллар бириэмэтэ үлэ чааһын кэмигэр буолан эбитэ дуу, киһи аҕыйах.
Отчуоту истибиттэр уонна дьүүллэспиттэр олохтоох дьаһалта ыытар үлэтин биһирииллэрин биллэрдилэр.
Яина ВЛАСЬЕВА