Бүгүҥҥүттэн саҕалаан улуус баһылыга Анатолий Григорьев нэһилиэнньэ иннигэр улуус дьаһалтата ыытар үлэтин-хамнаһын билиһиннэрэр отчуота саҕаланна.
Отчуоту нэһилиэктэринэн 4 бөлөҕүнэн сылдьан туруоруохтара.
Сунтаар улууһун баһылыгын экэнэмиичэскэй сайдыыга уонна былааннааһыҥҥа солбуйааччы Борис Васильев отчуоту Дьаархан, Уһун Күөл, Маар-Күөл нэһилиэктэригэр туруорда.
Киирии тылыгар Сунтаар улууһа анал байыаннай дьайыыга ыытар көмөтүн билиһиннэрдэ, дойдуга ыарахан кэмҥэ нэһилиэнньэ туора турбакка өйөбүллэрин иһин махталын биллэрдэ. Салгыы Сунтаар улууһа национальнай бырайыактарга, тыа хаһаайыстыбатыгар, тутуулар, бырамыысаланнас уо.д.а хайысхаларынан ыытыллар үлэлэр туһунан билиһиннэрдэ.
Дьаархаттар отчуокка кэлбит тустаах үлэһиттэртэн тыа хаһаайыстыбатыгар сыһыаннаах ыйытыктары, нэһилиэккэ кэлиҥҥи сылларга саҥа тутуу барбатын, суол-иис туһунан ыйыттылар.
Маар-Күөлгэ отчуоту истэ 48 киһи кэлбит.
Былырыыҥҥы отчуот кэнниттэн боротокуолга киирбит этиилэр үгүстэрэ туолбутун олус сэҥээрэ иһиттилэр. Маар Күөллэр өр көһүппүт саҥа успуорт саалара киирэн үөрүүлэрэ үгүс, махталларын биллэрэллэр. Кэлин саҥа сааланы дьарыктанар тэрилинэн хааччыйыыга үлэ барыаҕа диэтилэр. Олохтоохтор саҥа уһуйаан тутулларын туруорсаллар. Маныаха саҥа тутуулар дойдуга ыарахан балаһыанньа бүрүүкээбитинэн тохтуур туруктаахтарын иһитиннэрдилэр. Ол эрэн, ааспыт сылга улууска хаһааҥҥытааҕар да элбэх 13 эбийиэк үлэҕэ киирдэ диэн эттилэр. Түмүккэ, Маар-Күөллэр отчуоту биһириибит диэн сыанабылы туруордулар.
Уһун Күөлгэ улуус ыытар үлэтин-хамнаһын 60 киһи истэ кэллэ. Уһун Күөллэр ыйытыктара нэһилиэк эрэ иһинэн муҥурдаммата. Улуус киинигэр Сунтаарга сыһыаннаах боппуруостары ыйытан соһуттулар. Нэһилиэккэ аҕам саастаах дьон социальнай хантыраагынан үлэ тэриниэхтэрин баҕаралларын эттилэр. Тутатына социальнай харалта пуондатын үлэһититтэн хоруй ылан санаалара көнньүөрдэ.
Бөлөх салаайааччыта Борис Васильев-улуус баһылыгын экэнэмиичэскэй сайдыыга уонна былааннааһыҥҥа солбуйааччыта:
«Маннык көрсүһүүлэртэн улууспут дьоно-сэргэтэ туох санаалаах-оноолоох сылдьалларын билэбит, улуус сайдыытын торумнуурга ыллыктаах этиилэрин истэбит, ылынабыт. Чуолаан , Хочо нэһилиэгин олохтоохторо суол-иис, саҥа тутуулары,АЗС үлэтин туруорсаллар. Хас биирдии этиини болҕомтоҕо ылабыт. Ону тэҥэ, итэҕэстэрбитин эмиэ көннөрөбүт» .
Сиһилии Сунтаар улууһа 2024 сылга ыыппыт үлэтин-хамнаһын билиһиннэрэр отчуотун туһунан «Сунтаар сонуннара» телеграм каналга аах.
Мира АФАНАСЬЕВА