Куокунуга, Аллыҥаҕа, Тойбохойго буолбут отчуот кэмиттэн бэлиэтээһиннэр

Улуус дьаһалтатын отчуотун иннинэ улуус үлэтин толору көрдөрөр Сунтаар ТВ пуондадыттан хомуллан оҥоһуллубут Ольга Захарова, Ярослав Филиппов бэлэмнээбит видео отчуот нэһилиэк аайы көрдөрүлүннэ.

КУОКУНУ

Улуус дьаһалтатын отчуота сарсыарда 11 чаастан саҕаланна. Хата үлэ-үөрэх кэмэ диэбэккэ 42 киһи кыттыыны ылла. Отчуоту улуус баһылыгын бастакы солбуйааччы Павел Григорьев туруорда.

Олохтоохтор туруорсуулара, этиниилэрэ Кириэстээх-Куокуну суолун тупсарыыга, бэкээринэ бурдугар көмөҕө, рейсовай оптуобус сырыытыгар, уһуйаан уотунан ититиитин киин ититиигэ холбооһуҥҥа, нэһилиэккэ аптека, Кириэстээх сытар балыыһатын туруорсууга, тыа хаһаайыстыбатыгар сирдэри чөкөтүүгэ туһуланна.

Үгүс кэпсэтии доруобуйа харыстабылын тула буолла, ФАП-ка хайаан да фельдшери кытта сиэстэрэ баар буолуохтаах, Тойбохойго АЗС үлэтин сөргүтэрэ, нэһилиэккэ уопсай дьиэ тутуллара буоллар дэһэллэр. Мунньах бүтүүтүгэр уот баран салайааччылар ыйытыктаах дьоҥҥо чугаһаан кэлэн хоруйдаан сэһэргэһии кытта таҕыста. Отчуот түмүгэр Куокуну дьоно күргүөмүнэн улуус үлэтин «Биһириибит» диэн түмүк ылыннылар.

АЛЛЫҤА

Отчуокка 31 киһи кыттыыны ылла. Саамай сэргии көрбүтүм 11 кылаас үөрэнээччитэ Ян Емельянова кытта кэлэн отчуоту толору иһиттэ. Отчуоту туруорааччы Павел Григорьев — Аллыҥа нэһилиэгэ кэнники кэмҥэ олус элбэх саҥа тутуунан дьэндэйбитин, олус сайдыылаах нэһилиэк буоларын бэлиэтээтэ.

Аллыҥа дьоно хаарбах дьиэттэн көһөрүү барылынан өссө уопсай дьиэ тутуутун, чааһынай дьоҥҥо акылаат уларытыытыгар көмө, бэйэ дьыалатын сайыннарыыга субсидия, уот арахсыыта үксээбитин, Сунтаарга кыамматтар дьиэлэрэ баара буоллар, иһэр уубут Бэс күөлүн суола оҥоһуллан сунтаардар быыстала суох сылдьар буоллулар, онно харыстааһын өттүгэр үлэ, инбэлиит оҕоҕо олорор дьиэтин усулуобуйатын тупсарыы, доруобуйа харыстабылыгар үөс тааһын ылларыыга мобильнай биригээдэ кэлиэ дуо? Оскуола мастерскойун тутуута, Тойбохой АЗС үлэтин, тыа хаһаайыстыбатыгар сайылык сөргүтүүгэ, үүт харчыта эрдэ хамныырын, оттуур сирдэр ууларын түһэрии туһунан ыйытыктар турдулар.

Мунньах түмүгүнэн улуус дьаһалтатын үлэтин бары «биһириибит» диэн бигэргэттилэр.

ТОЙБОХОЙ

Тойбохойго отчуот доруобуйаларынан хааччахтаах дьону кытта үлэҕэ сүҥкэн кылаатын иһин Альбина Николаеваҕа добун сурук туттарылынна.

Мунньахха 106 киһи кытынна. Олохтоох дьон ыйытыктара, туруорсуулар: Дьиэ кэргэн сылыгар көмө төлөбүрдэр, АЗС үлэтэ, сыана үрдээһинигэр, бэкээринэ, тыа хаһаайыстыбатын сайдыытыгар көрүүлэр, эбиэс ас Сунтаарга кэлиитэ, сүөһүнү чиптааһын, саҥа уһуйаан тутуута, кулууп тымныыта, Бессонов үбүлүөйүгэр түмэл сарайын оҥоруу, Сунтаарга оҕону төрөтүү баар буолуохтаах, иһэр уу, сайыҥҥы уу ситимэ, төрүөбүт тыл, Сунтаар өрөгөй ырыатын оптуорунньукка оһуокайы кытта тэҥҥэ тутуохха, оҕону үлэҕэ иитии үлэтэ ыытыллыахтаах диэн этиннилэр.

Тускулаана Горохова-Кобельянова

 

Читайте дальше