2025 сыл ыам ыйын 15 күнүгэр Тэтим радиоҕа «Сарыал» музыкальнай биэриигэ биир дойдулаахпыт, ырыа, музыка учуутала, педагогическай үлэ, тыыл уонна сцена бэтэрээнэ, Дархан ырыаһыт, РСФСР норуотун үөрэҕириитин туйгуна А.В.Тихонов төрөөбүтэ 90 сылыгар аналлаах биэриини астына иһиттибит. Киэһэтигэр Тойбохойдооҕу
К.С.,А.В.Тихоновтар ааттарынан «Кыталык» КК «Ахтан,санаан ааһыаҕыҥ»- диэн ахтыы киэһэтэ Александр Васильевич ыллаабыт ырыаларын истииттэн саҕаланна.
Ахтыы киэһэтигэр Сунтаартан Саргын Баҕатаан, Людмила Пустолякова ыалдьыттаатылар.
Александр Васильевич кэргэнэ Клара Степановна тапталлаах кэргэнин олорон ааспыт олоҕун, үлэлээбит үлэтин туһунан, араас элбэх
фотоальбомнары наҕараадаларын,мэтээллэрин, доҕоро Н.П.Соловьев уруһуйдаан хаалларбыт портретын
аҕалан быыстапка оҥордо, хаартысканан слайд көрдөрдө.
Истиҥ иһирэх тылынан бииргэ төрөөбүт кыра балта Д.В.Тихонова, улахан оҕото Ю.А.Тихонов, А.В.Евсеев, А.К.Никитина,
В.И.Данилов, И.С.Иванов, Саргын Баҕатаан, Л.Н.Пустолякова сүрдээх үчүгэй истиҥ-иһирэх ахтыылары оҥордулар. Александр Васильевич сөбүлээн ыллыыр ырыалара элбэхтик ылланнылар. Кини доҕоро,бииргэ үөрэммит үөлээннээҕэ, Иннокентий Пахомов суруйбут хоһоонугар Александр Васильевич матыыбыгар «Оскуолатааҕы доҕотторбор» ырыанан көрсүһүүнү түмүктээтибит.
Надежда ПАВЛОВА «Кыталык»КК салайааччыта