Ааспыт субуотаҕа Бүлүүчээҥҥэ РСФСР норуотун үөрэҕириитин туйгуна, Сунтаар улууҺун норуотун хаһаайыстыбатын бастыҥ үлэһитэ, өр сылларга оҕону иитиигэ бэриниилээхтик үлэлээбит күн күбэй ийэбит, эйэҕэс эбэбит Екатерина Борисова үрдүк аатын үйэтитэр «Саныыр санаа сырдык суола оҕо дии — олох дьоло» диэн ахтыы киэһэтэ буолла.
Бу күҥҥэ бииргэ үөрэммит, уһуйааҥҥа үлэлээбит, алтыспыт үөлээннээхтэрэ, дьүөгэлэрэ кэлэн истиҥ иҺирэх тылларынан ахтан-санаан аастылар.
Тэрээһини ытыктыыр учууталбыт, Э.И.Пахомов түмэл салайааччыта Александр Кириллин иилээн-саҕалаан ыытта. Улуустан үөрэх салалтатын салайааччыта Борис Васильев эҕэрдэ тылын анаата уонна Александр Моисеевичка Махтал сурук туттарда. Сунтаартан «НьургуҺун» литературнай түмсүү салайааччыта Зинаида Васильева-Сыралыма махтал тылларынан уонна бэйэтин кинигэлэрин ийэбит сиэнигэр Джулия Александроваҕа уонна олохтоох бибилэтиэкэҕэ бэлэх туттартаата.
Ийэбит «Тураарыый күн тахсыыта», «Сылгы чыычааҕа», «Уолчааммар», «Оҕо» диэн хоһооннорун лиссиэй оҕолоро ааҕан иҺитиннэрдилэр. Сунтаар улууҺун судаарыстыбаннай автомобильнай инспекция салайааччыта (күтүөппүт) Сахайаан Александров ылбаҕай ырыатын бэлэх уунан дьон биһирэбилин ылла. Кэрэ киэһэбитин, «Чуораанчык» уҺуйаан иитиллээччилэрэ, «Сир симэхтэрэ» диэн ыллыыр оҕо бөлөҕө «Ийэ» диэн ырыа ыллаан киэргэттилэр. Ийэбит сөбүлээн ыллыыр «Оҕо саас» ырыатын култуура киинин дириэктэрэ Нюргустана Татаканова иһитиннэрдэ. Сүрүн чааһын, «Биһик» ырыанан, «Эйэҥ кыргыттара» түмүктээтилэр. Ол кэннэ, итии чэйдээх сандалы остуол тула, истиҥник кэпсэттибит, күндү киһибитин Екатерина Алексееваны ахтан-санаан аастыбыт.
Ийэбит эҥкилэ суох үлэтин туоһулуур араас грамоталара, хоһоонноро, урукку хаартыскалар, сэбиэскэй саҕанааҕы оҕо оонньуурдара быыстапкаҕа турбуттара ордук дьону сэргэхситтэ.
Ыҥырыыбытын ылынан кэлбит ыалдьыттарбытыгар махталбытын тириэрдэбит!
Эльвира ФЕДОРОВА, «Бүлүйээнэ» култуура киинин үлэһитэ. Бүлүүчээн.