Бүгүн, Тойбохой нэһилиэгэр салгын саатынан ытыыга бастакы региональнай күрэхтэһии буолла. Күрэхтэһиини Улуу Кыайыы 80 сылыгар, Тойбохой нэһилиэгин ытык сэрии бэтэрээннэрин, анал байыаннай дьайыыга тыыннарын толук уурбут биир дойдулаахтарын Айаал Николаев, Тойбохойдооҕу оҕо дьиэтин иитиллээччилэрин Рустам Егоров, Александр Чириков, Прокопий Дмитриев, Семен Обухов сырдык ааттарыгар ананна. Бу эдэркээн хорсун-хоодуот уолаттар эйэлээх олох иһин тыыннарын толук уурбуттарын нэһилиэгин дьоно умнубаттар, киэн тутталлар.
Кинилэр сырдык ааттарын үйэтитэр сыаллаах күрэхтэһиини С.Г.Кривошапкин аатынан оҕо дьиэтэ (сал.Леонтьева Л.В.) иккис төгүлүн тэрийэн ыытта. Оҕо дьиэтин үлэһиттэрэ иитиллээччилэрин дойдуларыгар бэриниилээх, туһалаах дьон буолан иитиллэн тахсалларыгар бары санааларын ууран туран үлэлииллэр. Ол иһин, маннык патриотическай ис хоһоонноох тэрээһиннэри тэрийэллэрэ үтүө үгэскэ кубулуйда. Оҕо дьиэтин үлэһиттэрэ иитиллээччилэрин: «Рустам, Саша, Проня, Сема мэлдьи сүүрбүт-көппүт, мэниктээбит, элэккэй майгылаах, үтүө санаалаах уолаттарынан биһиги өйбүтүгэр-санаабытыгар хаалыахтара…» диэн эппиттэрин уйадыйа иһиттибит. «Аҕа дойдуну көмүскээччилэр» пуонда Сунтаардааҕы филиалын салайааччыта Варвара Яковлева:
«Билигин дойду үрдүнэн ыччаты патриотическай тыыҥҥа иитии күүскэ турар. Анал байыаннай дьайыыга сырдык тыыннарын толук уурбут уолаттарбыт аатын үйэтитии биһиги ытык иэспит буолар. Ыччат дьон эйэлээх олоҕу кимнээх түстэспиттэрин билиэх тустаахтар».
Элбэх ыра санаалаах, инникигэ эрэллээх Айаал Николаев туһунан кини чугас дьоно бэлэмнээбит тэттик видеоны көрдөрдүлэр. Тэрээһиҥҥэ Айаал ийэтэ Юлия Николаева уонна балтылара кыттыыны ыллылар.
Айаал оҕо сааһыттан успуорду өрө туппут ыччат, футболунан утумнаахтык дьарыктаммыта. Ол да иһин, уолаттар элбэхтик сүүрбүт-көппүт, дьарыктаммыт успуорт саалаларыгар күрэхтэһиини тэрийбиттэрэ икки бүк суолталаах буолла.
Тойбохойдооҕу оҕо дьиэтин успуорт инструктора Василий Пермяков тус бэйэтэ бу уолаттары билэр, кинилэри кытта элбэхтик чугастык алтыспыт буолан ааттарын үйэтитиигэ, кэнчээри ыччакка уолаттар бойобуой суолларын тиэрдиигэ кыһаллар.
Василий Пермяков салгын саатынан ытыы күрэхтэһиитин иккис төгүлүн көҕүлээн ыытар. Быйыл саҥа элктроннай табло ылбыттарын күрэхтэһээччилэр олус сэҥээрдилэр. Кыттааччы ахсаана сыллата элбээн иһэр. Быйыл 4 хамаанда кыттарын биллэрдэ. Урут уруккуттан Тойбохойдор салгын саатынан ытыыга улууска бастыҥнар ахсааннарыгар киирэллэрэ: «Бүгүҥҥү күрэхтэһиибит 3 көрүҥүнэн барда: хамаанданан эстафета, куропатка уонна бэтэрээннэр. Бириистэрбит олус үчүгэйдэр. Быйылгы абсолютнай кыайыылаахха телевизор туруордубут. Тойбохойдор салгын саатынан ытыынан олус сөбүлээн дьарыктаналлар. 10 сыл буолла улууска салгын саатынан ытыы күрэхтэһиитигэр хамаанданан мэлдьи бастаабыппыт.»
Күрэхтэһии түмүгүнэн хамаанданан ытыыга 1 миэстэ Сунтаар хамаандата, 2 миэстэ Тойбохой хамаандата, 3 миэстэ Дьаархан хамаандата буоллулар. Күрэх абсолютнай кыайыылааҕынан Сунтаартан Анатолий Дмитриев буолла.
Мира АФАНАСЬЕВА
