Бэс ыйын 6 күнүгэр Сунтаар күөлүгэр самаан сайыны уруйдаан, айылҕа тыллыытын айхаллаан «Түөлбэ түһүлгэтэ» киэҥ далааһыннаахтык ыытыллыа. Олорор сиринэн бэйэни салайыныы тэриллибитэ 10 сылыгар аналлаах тэрээһиҥҥэ Сунтаар нэһилиэгин түөлбэлэрэ түмсүөхтэрэ. Бу күн кэлбит ыалдьыттарга «Сунтаар – Үс саха төрүтэ» театрализованнай дьүһүйүүнү көрдөрүөхтэрэ, тэрээһин үөрүүлээх чааһыгар Алгыс түстэниитэ, Сунтаар нэһилиэгин баһылыга Эдуард Филиппов алгыстаах сандалыта, Ил Дархан Гранынан тутуллубут кэнсиэртиир түһүлгэ үөрүүлээх арыллыыта уонна «Партизан» НАТК иһинэн үлэлиир кэлэктииптэр кэнсиэртэрэ тэриллиэҕэ. Маны таһынан араас сүүрүүлээх-көтүүлээх саха төрүт оонньуулара, куоҥкурустар о.д.а. ыытыллыахтара. Дьон саамай долгуйа кэтэһэр “Түөлбэ түһүлгэтэ” кэнсиэр сүүйүүллэх оонньуута тэрээһини түмүктүө.
Тэрийээччилэр Сунтаар нэһилиэгин олохтоохторун уонна ыалдьыттарын сахалыы таҥнан-симэнэн кэлэргитин, биир сомоҕо буолан түмсэргитин ыҥыраллар.
«Сунтаар сонуннара» эрэдээксийэтэ