Дьаархаҥҥа Албан аат искибиэрэ бүгүн дьон-сэргэ саҥатынан, оҕо-уруу күлүүтүнэн, мип-минньигэс ас сытынан туолла. Бэл диэтэр күһүҥҥү тымныы салгын сылыйбыкка дылы буолла.
Арассыыйа Федерациятын Судаарыстыбаннай Дууматын IX ыҥырыылаах дьокутааттарын талыы быыбарын 2 күнүгэр Дьаархан нэһилиэгэр «Көмүс күһүн» атыы-эргиэн дьаарбаҥката ыытылынна. Нэһилиэкпит тэрилтэлэрэ, оскуола үөрэнээччилэрэ араас сонун күрэххэ кытыннылар. «Бэрэски-пати» көрүҥҥэ оскуола кэлэктиибэ 18 араас истээх бэрэскини аҕалан амсаттылар. Кыттааччылар «Күһүҥҥү чэй» күрэскэ бэйэлэрэ оҥорбут, тас дойдулартан уонна араас амтаннаах ип-итии чэйдэрин иһэртилэр. Оҕуруоччут хаһаайкалар улахан, ураты үүнээйилэрин быыстапкалаатылар.
Дьаархаммыт төрүттэммитэ 255 сылыгар аналлаах фотозона оҥордулар. Казаҥҥа «Күһүҥҥү киһи күлбүтүнэн» диэн оҕуруот аһынан итии ас астаан ыалдьыттары күндүлээтилэр. Оскуола үөрэнээччилэрэ «Үүнээйи дьиэ кэргэнэ», «Күһүҥҥү букет» уонна айылҕа матырыйаалларынан оҥоһукка күрэхтэстилэр.
Бары ох курдук оҥостон, тэринэн кэлэн быыбар күнүн киэргэттилэр. Дьону-сэргэни сэргэхситэн ырыа арааһа ылланна, хоһоон бөҕө ааҕылынна. Математика биридимиэтин үөрэтэ кэлбит саҥа учуутал Арина Протопопова ыллыыр талаанын олохтоохторго иһитиннэрэн көрөөччү биһирэбилин ылла. Ол кэннэ дьаарбаҥка кыттыылаахтара уонна ыалдьыттара күргүөмүнэн киирэн үөрэ-көтө куоластаан бардылар.
Анна МАРКОВА, Дьаархан
Ааптар хаартыскаҕа түһэриитэ