Куокуну нэһилиэгэ — Сунтаар улууһун арҕаа уһугар, Бүлүү өрүс уҥа уонна хаҥас кытылларынан тайаан сытар былыргы уонна дириҥ устуоруйалаах сир буолар.
Куокуну былыргы суруктара уонна номохторо ахтыллар Саха сирин үгүс улуустарын кытта сибээстээх төрүт олохтоох сир. Нэһилиэк сирэ — уота айылҕатын баайынан, сыһыытынан — хонуутунан уонна Бүлүү өрүс балыктаах хомолорунан биллибит.
Сэбиэскэй былаас сылларыгар нэһилиэккэ маҥнайгы артыаллар уонна холкуостар тэриллибиттэрэ, 1931 сыллаахха начаалынай оскуола аһыллыбыта.
1934 с . алтынньы 14 күнүгэр Куокуну нэһилиэгэ үөскээбитэ. Олохтоохтор сылгы, ынах-сүөһү иитиитигэр, сир оҥоруутугар көхтөөхтүк үлэлииллэр. Өрөспүүбүлүкэҕэ биллэр агрооскуола манна олоҕуран үлэлиир, оҕолору кыра саастарыттан сиргэ, тыа хаһаайыстыбатыгар үлэлииргэ сыһыарар ураты үлэ олохтоммута.
Сэрии сылларыгар Куокуну нэһилиэгиттэн элбэх хорсун буойун фроҥҥа аттаммыта. Кинилэр дойду көмүскэлигэр хорсуннук кыргыспыттара, тыылга хаалбыт кырдьаҕастар, дьахталлар уонна оҕолор «Барыта фронт туһугар » лозунунан күнү түүнү аахсыбакка үлэлээбиттэрэ, Улуу Кыайыыны уһансыбыттара.
Куокуну устуоруйатыгар сорох кэрэхсэбиллээх чахчылар эмиэ бааллар. Холобур, 1934 сыллаахха Элгээн сиригэр кэриэй омук сыдьаана О Чо Си (Очосов) кэлэн олохсуйан үлэлээн-хамсаан ааспыт суола нэһилиэк устуоруйатыгар хаалбыт. Ону таһынан айылҕаттан айыллыбыт хорсун, күүстээх дьон уонна чулуу үлэһиттэр норуот кэпсээнигэр куруук ахтыллаллар.
Бүгүҥҥү күҥҥэ Куокуну нэһилиэгэр 150-тан тахса ыал (хаһаайыстыба) олорор. Олохтоох дьон ахсаана 508 киһи.
Нэһилиэги уруйдуур, нэһилиэкпит гимнэ буолбут «Куокуну — мин дойдум » биир дойдулаахпыт Илья Иевлев ырыата үбүлүөйдэргэ, кэнсиэртэргэ ылланар.
Ангелина ГЕНЕРОВА
Куокуну, уопсастыбаннай кэрэспэдьиэн