2026 сыл Куокуну нэһилиэгэр Егор Михайлович Молотков сылынан биллэриллибитэ. Бэс ыйын 13 күнүгэр уопсастыбаннай диэйэтэл, саха бастакы бөлүһүөгэ, 1907-1910 с.с. Хочо улууһун кулубата уонна мировой судьуйанан үлэлээбит Егор Михайлович Молотков төрөөбүтэ 171 сылыгар аналлаах Куокуну нэһилиэгин Үрүҥ Тунах Ыһыаҕа буолан ааста. Ыһыах үөрүүлээх аһыллыытыгар кыттыыны ыллылар Е.М.Молотков хос сиэннэрэ:
Попова Д.М.Саха Өрөспүүбүлүкэтин Жатайдааҕы техникумун медицинэ салаатыгар преподавателэ, Попов И.А. урбаанньыт, Киренская М.В. Колдрагметалл старшай менеджерэ, Попова Л.М. Илин Сибиирдээҕи наука Академиятын инженера, Россия наукаҕа Академиятын үтүөлээх үлэһитэ, Слепцова И.И. М.К.Аммосов аатынан ХИФУ айылҕа наукаларын институтун устудьуона, Сунтаар улууһун ыччат политикатыгар салайааччыта Иванов Т. А., «СунтарАвтодор» салайааччыта Тэн В.Д.. Үгэс быһыытынан ыһыах алгыстан, түһүлгэни тула сүгүрүйүүттэн саҕаланна.
Биһиги биир дойдулаахтарбыт искусство оскуолатын дириэктэрэ Степанов А.К. уонна дириэктэри солбуйааччы Кириллина Л.В. туруорууларынан Е.М. Молотков олорон ааспыт олоҕун, үлэтин дьүһүйэн көрдөрүлүннэ уонна искусство оскуолатын оҕо үҥкүү ансаамбыла түһүлгэни киэргэттилэр. «Саха маанылаах таҥаһа», «Уһун суһуох», «Халадаайдаах сүүрүү», «Бастыҥ хорчуоппа», «Сахалыы астаах сандалы» уо.д.а күрэхтэр спонсордар көмөлөрүнэн ыытылыннылар. Хочо нэһилиэктэрин 18-тан үөһээ саастаах эр дьоннорго «Хочо Хоһууна» күөн күрэс уонна ХЭТ “Сунтарцеолит” генеральнай дириэктэринэн үлэлээбит, биир дойдулаахпыт Евгений Ильич Иванов аатынан «Бэдик Боотур» 2019-2016 сыллаах төрүөх уолаттарга аһаҕас күөн күрэс үрдүк таһымҥа ыытылыннылар.
«Бэдик Боотур» күөн күрэс: 1 миэстэ – Данилов Тимур, Сунтаар (10 000 солк., спонсор Иванов Евгений Ильич оҕолоро, сиэннэрэ)
2 миэстэ – Генеров Айхал, Сунтаар (10 000 солк., спонсор: «Автодор»)
3 миэстэ – Иванов Эрсан, Куокуну (5000 солк., спонсор: Анисимов Владимир Федорович оройуон сэбиэтин депутата)
«Хочо Хоһууна — 2026» — күөн күрэскэ 7 көрүҥҥэ Куокунуттан 5 уол, Тойбохойтон 5 уол, Аллыҥҥаттан 1 уол күүстээхтэр, сымсалар күөн көрүстүлэр. Күрэс түмүгүнэн дьоһун кыайыылаахтар быһаарылыннылар:
1 миэстэ – Сергеев Арылхан, Аллыҥа (100 000 солк., спонсор: Егор Михайлович Молотков удьуордара)
2 миэстэ – Решетников Зафарджон, Тойбохой (70 000 солк., спонсор: Егор Михайлович Молотков удьуордара)
3 миэстэ – Дмитриев Андрей, Тойбохой (50 000 солк., спонсор: Егор Михайлович Молотков удьуордара)
Куокунубут нэһилиэгин ыһыаҕар саха омуга сайдыытын ситимэ быстыбатын бигэргэтэн бары түмсэн үөрдүбүт — көттүбүт.
Ангелина ГЕНЕРОВА- уопсастыбаннай кэрэспэдьиэн,
Куокуну