Сунтаар улууһугар «Готов к труду и обороне» диэн лозуннаах Бүтүн Арассыыйатааҕы физкультура-спорт комплексын нуорматын толорууга «Мир! Май! ГТО!» өрөспүүбүлүкэтээҕи бэстибээл саҕаланна. Сарсыарда 11:00 чаастан “Алмаз” стадионугар 5-с кылаас үөрэнээччилэриттэн саҕалаан аҕам саастаахтарга диэри баҕалаах дьон тоҕуоруһа муһуннулар.
Бу тэрээһин дьон-сэргэ маассабай спордунан дьарыктанарыгар, доруобуйатын бөҕөргөтөрүгэр, итиэннэ эт-хаан өттүнэн сайдыылаах буоларын туһугар сылын ахсын ыытыллар. Ону тэҥэ, олохтоох дьон күүстэрин туругталларыгар кыаҕы биэрэр.
Тэрээһин үөрүүлээх арыллыытыгар Сунтаар улууһун баһылыгын бастакы солбуйааччыта Павел Григорьев, Сунтаар улууһун баһылыгын социальнай-имиджевэй политикаҕа солбуйааччы Альберт Иванов, улуус спорка уонна физкультураҕа салаатын салайааччыта Дьулустан Егоров, улуустааҕы үөрэҕирии салаатын салайааччыта Борис Васильев, улуус бэтэрээннэрин Сэбиэтин бэрэссэдээтэлэ Афанасий Васильев, А.И. Иванов аатынан олимпийскай эрэллэри бэлэмниир спорт оскуолатын дириэктэрэ Павел Павлов уонна Сунтаардааҕы «Байҕал» сөтүөлүүр уораҕай дириэктэрэ Владимир Данилов ааспыт сылга ГТО нуорматын туттарбыт дьоҥҥо дастабырыанньалары туттартаатылар. Маны таһынан, спорду өрө тутар бастыҥ тириэньэрдэр махтал суругунан наҕараадаланнылар. Салгыы кыттааччылар эти-хааны уһугуннарар сэрээккэни оҥорон, биир-биир саастарынан араас көрүҥнэргэ нормативтары туттардылар.
ГТО нуорматын туттарбыттар кыһыл, үрүҥ уонна боруонса бэлиэлэринэн наҕараадаланаллар, итиэннэ араас чэпчэтиилээх көмөнөн туһанар кыахтаналлар.
Елизавета ТИТОВА