Олунньу 3-5 күнүгэр Сунтаардааҕы оҕо искусствотын оскуолатын базатыгар 5-с төгүлүн “Грани мастерства” үөрэнээччилэргэ, учууталларга, уһуйааччыларга аналлаах өрөспүүбүлүкэтээҕи уруһуй олимпиадата ыытылынна. Олимпиада академическай уруһуй, академическай живопись, айар үлэ диэн хайысханан барда. Үс көрүҥҥэ барытыгар ситиһиилээхтик кыттыбыт кыттааччы Кылаан кыайыылаах аатыгар киирсэр. Кыттааччылар сирэй уонна кэтэхтэн кытыннылар. Сирэй кыттыыга Миирнэй (Арыылаах бөһ.) уонна Ньурба улууһуттан кэллилэр. Бу улуустар олимпиада биэс сыл ыытылларын тухары, мэлдьи кытталлар. Кинилэри кытта бэйэбит улууспут оскуолаларын учууталлара, эбии үөрэхтээһин уһуйааччылара, үөрэнээччилэрэ күрэстэстилэр. Бырайыак ааптардара дириэктэри үөрэх чааһыгар солбуйааччы Кириллина Л.В., дизайн кылааһын үрдүкү таһымнаах уһуйааччыта, СӨ култууратын туйгуна Горохова М.В.
Быйылгы үлэбитигэр, ыҥырыыбытын ылынан Геокультурнай үнүстүтүүт сүрүннүүр мэтэдиистэрэ Бережнова А.Н., Донская И.П. кэлэн үлэлэстилэр. Оскуола үлэтин, үлэһиттэрин кытта билсэн, тугунан тыынан, хайдах-туох үлэлии-хамсыы олорорбутун көрөн-истэн, сүбэ-ама биэрэн, үлэһиттэри кытта сирэй көрсөн кэпсэтэн, хас биирдиибит санаабытын истэн, үөрэхтээһин ыытан – сүрдээх таһаарылаах икки күн ааста.
Итини таһынан, 4с чыыһылаҕа СӨ култууратын туйгуна, СӨ ырыа айааччыларын холбоһугун чилиэнэ, “Туой Хайа 2021” — Кылаан кыайыылааҕа, “Үрдэл 2024” — “Бастыҥ дьүрүскэн айааччы” анал аат кыайыылааҕа, ырыа айааччы уонна ырыаһыт Инна Донская – Дайаана “Айар кутум абылаҥа” диэн олус истиҥ ырыа дьоро киэһэтин Сунтаар дьонугар-сэргэтигэр бэлэхтээтэ. Кэнсиэр билиэтэ атыыланарын саҕана, ол кимий, ханнааҕыный диэн ыйытыктар элбэх эбит буоллахтарына, кэнсиэр кэннэ чахчы да айылҕаттан талааннаах, мааны куоластаах кыыс эбит диэн көрөөччүлэр сыаналаатылар. Бу кэнсиэргэ “Айыллыы” үҥкүү бөлөҕө, “Айдарыы” хор уонна гитара кылааһын уһуйааччыта Анатолий Пахомов кыттыыны ыллылар.
Олимпиада экспертарынан, бэһис сылын Степанов А.И., П.П.Романов аатынан уруһуй орто анал үөрэх кыһатын “Дизайн” салаатын сэбиэдиссэйэ уонна иккис сылын Миирнэй оҕо искусствотын оскуолатыттан уруһуй кылааһын уһуйааччыта Никифорова Н.А., кэлэн үлэлэстилэр. П.П.Романов аатынан ДЬХУ(К) дириэктэрэ К.П.Гаврильевка уонна Миирнэй оҕо искусствотын оскуолатын дириэктэрэ И.В. Бадмаеваҕа, түгэнинэн туһанан, махталбытын биллэрэбит. Экспердэр 1000нан үлэни сыаналаатылар, ол курдук Өлүөхүмэ, Нам, Амма, Таатта, Орто Халыма, Мэҥэ Хаҥалас, Миирнэй, Ньурба, Бүлүү, Үөһээ Бүлүү, Усуйаана, Өймөкөөн, Уус Алдан, Хаҥалас, Өлөөн, Алдан, Томпо, Чурапчы, Горнай, Сунтаар улуустарыттан кэтэхтэн 400 тахса киһи, сирэй – 80тан тахса киһи кыттыыны ыллылар. Олимпиада икки сыл пандемиянан сибээстээн, кэтэхтэн эрэ ыытыллыбыта. Онон быйыл кыттааччылар, сирэй кыттарга сүргэлэрэ көтөҕүллэн кэлэн кытыннылар. Саамай бу олимпиадаҕа кытталларын, бэйэ бэйэлэрин кытта көрсөн санаа, уопут атастаһалларын, учууталлар уонна уһуйааччылар сөбүлүүллэр. Бу икки күҥҥэ кинилэр бэйэлэрэ үөрэнээччи оруолугар буолан айар үлэ алыптаах эйгэтигэр ыллараллар, саҥа санаалар, иэйиилэрэ уһуктар.
Үлэ түмүгүнэн ДШИ, ДХШ үөрэнээччилэрэ, уопсай үөрэхтээһин оскуолатын үөрэнээччилэрэ уонна учууталлар, уһуйааччылар диэн үс бөлөҕүнэн 1,2,3 миэстэлээх дипломнар, Кылаан Кыайыылаахха хайҕал сурук уонна харчынан бириэмийэ туттарылынна, Кыайыылаахха өссө Сунтаар улууһун Арыылаах орто оскуолатын уруһуйга бэтэрээн учуутала Иванова Р.А. бэйэтин анал харчынан бирииһин уонна эҕэрдэ суругун туттарда. Кыайыылааҕынан Миирнэй улууһун Арыылаах орто оскуолатын 11 кыл. үөрэнээччитэ (ДШИ выпускницата) Татьяна Степанова буолла, салайааччы Винокурова М.А. Марианна Афанасьевна оҕолоро бу биэс сыл тухары мэлдьи ситиһиилээхтик кытталлар, хайаан да миэстэлэһэллэр, быйыл даҕаны оҕолоро бары миэстэлэһэн, өссө туруоруммут сыалларын ситиһэн – Кылаан Кыайыылаах аатын ылан үөрүүлэрэ өссө үрдээн бардылар.
Сиһилии, призердар ааттарын-суолларын, хантан сылдьалларын, ким хаһыс миэстэ буолбутун оскуолабыт сайтыгар киирэн көрүөххүтүн сөп.
Кэлэн үлэлэспит коллегаларбытыгар, кыттыбыт учууталларга, уһуйааччыларга, үөрэнээччилэргэ оскуола кэлэктиибин, тустаан дириэктэрбит А.К.Степанов, бары тэрийээччилэр ааттарыттан махтанабыт, инники үлэҕитигэр, үөрэххитигэр өссө үрдүк чыпчааллары, саҥа саҕахтары, арыйыылары, уостубат иэйиини баҕарабыт.
Лилия Кириллина- Сунтаар оҕо искусствотын оскуолатын дириэктэри үөрэх чааһыгар солбуйааччы