Хоролор аҕам саастаах ытык дьонноругар күргүөмүнэн «Сунтаар сонуннарын» улуус хаһыатын суруттардылар. Бачыымы «Харысхал» КК көҕүлээтэ. Баһылык Ефимов Валерий Петрович дьиэ кэргэнинэн бэйэтин холобурунан аҕам саастаах дьоҥҥо бастакынан улуус хаһыатын суруттарда. Олохтоохтор уопсайа 12 ыалга сойбот сонуннаах «Сунтаар сонуннара» улуус хаһыатын суруттардылар. Бу үтүө соруктаах хамсааһыны улууска Аҕам саастаахтарга ытыктабыл сылыгар анаатылар. Бу хамсааһыны атын нэһилиэктэр эмиэ өйүүллэригэр ыҥырдылар.
Нэһилиэккэ аҕам саастаах дьоҥҥо аналлаах тэрээһиннэр салҕаналлар. «Харысхал» КК аҕам саастаахтарга билиини тургутар өй-толкуй оонньуутун ыыттылар. Оонньууга үс хамаанда иккилии киһилээх кытыннылар. Ефимова Наталья Ильинична, Корякина Екатерина Борисовна хамаандата кыһыл көмүс мэтээлгэ тиийэннэр үөрүү-көтүү үктэллэннилэр. Онтон үрүҥ көмүс мээтээллэргэ Николаева Лидия Ивановна, Герасимова Полина Петровна уонна Матвеева Анастасия Федоровна, Яковлева Нина Ильинична хамаандалара тиийдилэр. Оонньуу олус интэриэһинэйдик, көхтөөхтүк ааста. Ол курдук, кыттааччылар викторинаҕа эппиэттэстилэр, таайтарыылаах таабырыннары таайдылар. Элбэх таабырыны таайбыт Лидия Николаева уонна Екатерина Корякина сахалыы кинигэлэри бэлэх туттулар. Бу күн олохтоох бибилэтиэкэ кинигэ быыстапкатын туруорда, бибилэтиэкэ үлэһитэ Светлана Игнатьева саҥа кинигэлэри билиһиннэрдэ. Ону тэҥэ, ас атыыта дэлэччи тардыллан атыыланна. Тэрээһиҥҥэ кэлбит дьон астынан, дуоһуйан тарҕастылар.
Вера ИВАНОВА
