Алтынньы бүтэһик баскыһыанньатыгар суоппар уонна тырааныспар үлэһиттэрин күнэ бэлиэтэнэр .
Быйыл алтынньы 25 күнүгэр түбэстэ.
Бу профессиональнай бырааһынньыктарынан сыыдам сырыылаах суоппардары эҕэрдэлиибин!
Аныгы үйэ сиэринэн дьон бары тимир көлө үрдүгэр олорон олохторун тэтимин түргэтэтэллэр, элбэҕи ситиһэллэр.
Урукку ааспыт үйэ 90-2000 сылларга тэҥнээн көрдөххө бүгүҥҥү күҥҥэ техниката суох ыал диэн суоҕун кэриэтэ, аныгы кыахтаах «Боотур», «Сокол», Каракаттар,Бураннар, квадрациклар, тыраахтыр арааһыттан баар.
Баччаларга күһүҥҥү хахсаат кэмҥэ , тымныы дьыбардаах сарсыарда идэһэ өлөрөн тэлгэтэрбит ону сэргэ халандаарга суоппар күнэ ыйыллан турара, хайдах эрэ идэһэ өлөрүүтэ суоппар күнүн кытта дьүөрэлиир эбиппин.
Тыа дьоно барахсаттарга үлэ-хамнас күөстүү оргуйар ытык кэмэ: саһаан тиэллиитэ, муус ылыыта о.д. а.
«Киһи киьинэн олорор , ойуурдаах куобах охтубат , киһилээх киһи тутайбат » диэн муударай этиигэ олоҕуран , дьон аһара харчыга хараҥарбатах эбит диэн санааҕа кэлэн ис сүрэхпиттэн тахсар махталбын Сиэйэм оҕотугар , таксист Александр Яковлевка тириэрдэбин. Кини көрдөһүүбүн быһа гыммакка мэлдьи ылынар (бүтэһик сырыы өрүс хаайыыта кэмигэр). Кыра да, сүүтүк саҕа көмө киһини кынаттыыр, үөрдэр көтүтэр.
Сашаҕа дьыалаҥ -куолуҥ, биисинэһиҥ иилии эргийэ, сайда турарыгар баҕарабын. Ыраах айантан сылайан-элэйэн кэлэргэр дьиэҕэр истиҥ сыһыан , таптал , өйдөһүү баар буоллун!
Куоратынан кэлэр-барар сыыдам сырыылаах бырааппытыгар Проня Семеновка махтал мааныта!
Киһи эрэ барыта массыыналаах , көлөлөөх буолбатах үйэтигэр Сиэйэнэн,Күөх Ньурбанан , Сунтаарынан уоптабайынан барар -кэлэр Татьяна, Алексей Меркурьевтарга сакаастыырбыт, ылларарбыт ханна барыай , ыалларбар туспа махтал тылларын туһаайабын!
Суоппар күнүнэн , сырыыгыт сыыдам, айаҥҥыт аргыстаах буоллун !
Зоя СЕМЕНОВА, Сиэйэ.