Варвара МАКСИМОВА-КҮННЭЙ
Сайын кэлиитэ
Сайын кэлбит бэлиэтэ
Кэҕэ этэн чоргуйда,
Күммүт уота күүһүрэн
Сырылатан сыдьаайда.
Ача оппут тэлгэннэ
Тэлгэһэбин симээтэ,
Сибэккинэн киэргэттэ
Кэрэтийэн көһүннэ.
Араас өҥнөөх лыахчааннар
Тэлээрэннэр көтөллөр,
Чэчиктэртэн чэчиккэ
Түһэ, түһэ дайаллар.
Уулаах былыт таҕыста
Этиҥ этэн ньиргийдэ,
Кымньыы уоттаах сурааһын
Чаҕылыйан көһүннэ.
Тохтообокко дохсуннук
Курулатта ардахпыт,
Утаппыттыы ыймахтаан
Иҥэриннэ сир ньуура.
Күүстээх ардах кэнниттэн
Күммүт үөһэ күөрэйдэ,
Сэттэ өҥнөөх кустукпут
Оргуһуохтуу ыйанна.
Сайыммыт саҕаланна
Үөрүү-көтүү үксээтэ,
Ырыа чыычаах ыллаата
Күлүмүрдүү күн тыкта.
Сталина ГУЛЯЕВА
Сунтаар ыһыаҕа оһуохайы кэтэһэр
Ыгыатта ытык сиригэр
Удьуордарын утумнаан
Айылҕалыын алтыһан
Айыллан-сайдан испитэ
Сунтаар ыһыаҕа
Сэргэй Сибиэрэби санатар
Сунтаар ыһыаҕа
Оһуохайы кэтэһэр.
Саха үгэһин үөрэтэн
Үйэлээх үҥкүүлэри
Үрдүккэ көтүтэн
Үгүс норуокка тиэрпитэ
Сунтаар ыһыаҕа
Сэргэй Сибиэрэби санатар
Сунтаар ыһыаҕа
Оһуохайы кэтэһэр.
Оһуохайы оһуордаан
Ыһыах дьонун
Үөрүүтүн үксэтэн
Сүргэтин көтөхпүтэ
Сунтаар ыһыаҕа
Сэргэй Сибиэрэби санатар
Сунтаар ыһыаҕа
Оһуохайы кэтэһэр.
Кэлэр ыччат Сэргэй Сибиэрэп
Алыптаах оһуохайын
Ааттата туруохтун
Сунтаар ыһыаҕа
Сэргэй Сибиэрэби санатар
Сунтаар ыһыаҕа
Оһуохайы кэтэһэр.
Дина НИКОЛАЕВА-Алаас Кыыһа
Сайын кэллэ
Күммүт күлэн мичилийдэ
Сылааһынан сыдьаайда,
От-мас көҕөрдө,
Сибэкки ситэн силигилээтэ.
Дьуру-дьуру дьурулата
Күөрэгэйбит ыллаата
Сайыҥҥы сылаас күннэри
Дьурулата дьүрүһүттэ.
Кэҕэ этэн чоргуйда,
Кэлбит кэрэ сайыны
Эҕэрдэлии тоһуйда.
Эбэ уута сылыйда,
Сөтүө кэмэ дьэ кэллэ,
Оҕо аймах үөрдэ-көттө,
Эбэ уутугар чомполонно.
Айылҕа кэрэ ырыата
Алаас иһин толордо,
Кэллэ кэрэ сайыммыт
Кэтэһиилээх кэмнэрбит.