Татарстан киин куоратыгар Казаньҥа ыам ыйын 19-24 күннэригэр Бүтүн Арассыыйа бибилэтиэкэрдэрин улахан тэрээһиннэрэ — кэнгириэс буолан ааста. Саха сириттэн улахан дэлэгээссийэ кыттыыны ылла. Сунтаар улууһуттан Кэмпэндээйи бибилэтиэкэрэ Татьяна Местникова, киин бибилэтиэкэттэн Мария Иванова сырыттыбыт.
Быйылгы кэнгириэс уратыта диэн Арассыыйа эрэ буолбакка, атын 12 араас дойдуттан кыттан киэҥ таһымнаах буолла. Биир кэмҥэ араас секцияларынан, төгүрүк остуолларынан, практикалаах оскуолаларынан хайдыһан, барыта 1500 киһи уопуттарын атастаһан элбэххэ үөрэннилэр, Арассыыйа бөдөҥ кинигэ бэчээттиир кыһаларын быыстапкаларын көрдүлэр.
«Аныгы бибилэтиэкэлэргэ кыраайы үөрэтии» секцияҕа Татьяна Местникова кыраайы үөрэтиигэ кулууптары тэрийии туһунан дакылаата дьон сэҥээриитин ылла. Атын регионнартан кэлбит ыалдьыттар Татьяна Ивановна үлэтин далааһына киэҥин сөхтүлэр, биһирээтилэр.
Маны таһынан, аныгы кэм суруйааччыларын кытта көрсүһүүлэр, Татарстан Национальнай бибилэтиэкэтин, куорат, өрөспүүбүлүкэ кэрэ-бэлиэ миэстэлэрин устун араас экскурсиялар тэрилиннилэр. Кэнгириэс үлэтин бүтэһик күнүгэр идэлээх тур тэрийэн тыа бибилэтиэкэлэригэр ыалдьыттаатыбыт. Апастово диэн оройуон киин модельнай уонна Давликеево тыа бибилэтиэкэлэригэр кэллиэгэлэрбит үлэлэрин сиһилии билистибит, олохтоох түмэлгэ сырыттыбыт.
Эһиилги Кэнгириэс Удмуртия Өрөспүүбүлүкэтин киин куоратыгар Ижевскэй куоракка ыытыллар диэн быһаарылынна.
Мария ИВАНОВА, Казань куорат