Муус устар 19 күнүгэр, Сунтаардааҕы киин бибилэтиэкэҕэ «Библиосумерки» култуурунай аахсыйа буолан ааста.
«Библиосумерки» Арассыыйа үрдүнэн ыытыллар ааҕыы уонна кинигэ бэстибээлэ буолар. Бу аахсыйа бастакытын Арассыыйаҕа 2012 сыллаахха ыытыллыбыта, оттон Сунтаардааҕы киин бибилэтиэкэҕэ 2013 сылтан саҕалаан ыытыллар.
Быйыл «Библиосумерки» Арассыыйаҕа дьиэ кэргэн, Саха сиригэр Оҕо саас уонна Сунтаар улууһугар Аҕам саастаахтарга ытыктабыл сылларын чэрчитинэн ыытылынна.
Тэрээһиҥҥэ Сунтаар араас оскуолатын оҕолоро кэлэн кытыннылар.
Аахсыйа чэрчитинэн Сунтаардааҕы киин бибилэтиэкэҕэ дьиэ кэргэҥҥэ, оҕолорго уонна саастаах дьоҥҥо аналлаах тэрээһиннэр буоллулар. Ол курдук «Семейная реликвия» кинигэ быыстапката түмүктэннэ, ити быыстапка кыттааччылара дьиэлэригэр баар сэдэх, былыргы кинигэлэри, сурунааллары аҕалбыттар.
Бу сылга Арассыыйаҕа А.С Пушкин төрөөбүтэ 225 сыла бэлиэтиир тэрээһин чэрчитинэн, кини айымньыларынан оҕолорго аналлаах «В гостях у лукоморья» оонньуулар ыытылыннылар. Ону сэргэ оҕолорго араас оонньууну оонньоотулар, ол курдук «Тобул» остуол оонньуута, «Почитаем — поиграем», «К.К.К», уонна «Биэс ынахтаах Бэйбэрикээн эмээхсин» киинэ остуоруйатынан «киноквиз» оонньуу ыытылынна.
Ону кытары «Ньургуһун» литературнай түмсүү чилиэнэ Варвара Максимова-Тырымнаайы «Ыллыыр ырыам» диэн саҥа кинигэтин сүрэхтээтилэр. «Петуния үүннэриитин кистэлэҥнэрэ» маастар- кылаас уонна баҕалаах дьоҥҥо «Пушкинскай карта» оҥордулар, саастаах дьоҥҥо Госуслуги сыһыарыыны туттарга сүбэ-соргу биэрдилэр.
Олус үчүгэй тэрээһиннэр буолан аастылар, кэлбит дьон аһара астынан бардылар.
Дмитрий ЫМЫЧАНОВ