Бүгүн — Аан дойдуга кинигэ бэлэхтиир күн. Кэмпэндээйи олохтоох бибилэтиэкэтигэр бу күн үгүс кинигэни бэлэхтээтилэр. Аан бастакынан Кэмпэндээйи төрүт олохтооҕо, Сунтаартан кэлбит Изабелла Гаврильевна Спиридонова соторутааҕыта бэчээттэнэн тахсыбыт «Көҕүөр» ансаамбыл 5 сыллаах үбүлүөйүгэр бэчээттэммит халыҥ альбом кинигэни саҥа кулууп үрдүк сыанатыгар туттарда.
Онтон биир дойдулаахпыт, Ил Түмэн дьокутаата Андрей Николаев тахсан: «Бүгүн Аан дойдутааҕы кинигэ бэлэхтиир күҥҥэ бэйэм дьиэм уонна дьонум бибилэтиэкэтиттэн 208 кинигэни эһиги бибилэтиэкэҕитигэр бэлэх аҕалбыппын туттарыам, бары кинигэтэ ааҕыҥ, кинигэни аахтаххытына, билиилээх, дьоллоох, күүстээх санаалаах дьон буолаҕыт», — диэн этэн туран, дохсун ытыс тыаһыгар доҕуһуоллатан туттарбытыттан олус үөрдүм, долгуйдум. Андрей Юрьевич кинигэлэрин барытын бибилэтиэкэҕэ киллэрэн биэрдэ. Оҕо эрдэҕиттэн умсугуйан ааҕарын, сөбүлээн аахпыт кинигэлэрин туһунан кэпсээтэ. Кэмпэндээйи ааҕааччыларыгар анаан бэйэтин санаатын тиэртэ.
Сусанна Пахомова
Зоя Авксентьева
Бу күн олохтоохтор Сусанна Пахомова, Зоя Авксентьева эмиэ бэрт үчүгэй кинигэлэри бэлэхтээтилэр. Онон Аан дойдутааҕы кинигэ бэлэхтиир күҥҥэ олохтоох бибилэтиэкэҕэ барыта 225 кинигэни бэлэхтээтилэр.
Татьяна МЕСТНИКОВА, бибилэтиэкэр.