Сунтаар сэлиэнньэтин төрүт олохтоохторо Розалия Гаврильевна уонна Афанасий Кириллович Васильевтар сүрэхпитинэн сөбүлэһэн, харахпытынан хайҕаһан, дьолбутун холбоон бииргэ олорбуппут 56 сыл буолла.
Биһиги, «Элгээйи» сопхуос Партизаннааҕы отделениетыгар үлэлиир эдэр ыччат, ыытыллар уопсай үлэлэргэ актыыбынайдык кыттарбыт, улууска ыытыллар уус-уран күрэстэргэ бастыҥнар кэккэлэригэр киирэрбит. Отделениебыт бас-көс дьонун кытта күһүн бары түмсэн кустуу, куобахтыы, муҥхалыы барарбыт. Күүстээх хомуур үлэтин кэнниттэн сынньанар этибит. Үтүө-мааны дьону кытта үлэлээн оскуола кэнниттэн олох киэҥ аартыгар тахсыбыппыт. Дьэ, ити кэмҥэ Розалиябын сэмэйин, кэрэтик да ыллыырын сөбүлээн бэлиэтии көрө сылдьыбытым. Роза даҕаны миигин таба көрөн, тапталбыт күүһүн холбоон сыбаайба тэрийэн ыал буолбуппут. Онтубут да остуоруйалаах этэ. Сиэр быһыытынан сыбаайба иннинэ олохтоох сэбиэккэ саахсалана тиийбиппит. Онно сэбиэт сэкирэтээрэ, сэрии кыттыылааҕа киһи үөрэ-көтө көрүстэ: «Эһиги эдэр ыал буолар дьон биир сыл испытательнай болдьоҕу ааһаҕыт, холбоһон олороҕут, оттон эһиил кэлэн дьэ саахсаланаҕыт», – диэтэ. Биһиги, истигэн дьон, сөбүлэһэн дьиэлээтибит.
Күһүн ыал буоллубут. Эһиилигэр саахсаламмыппыт. Маҥнайгы оҕобут, Маша, икки сыл буолан баран күн сирин көрбүтэ. Ол үөрүүтэ-көтүүтэ дьикти кэрэ этэ. Билигин үрдүк категориялаах сиэстэрэ, доруобуйа харыстабылын туйгуна. Уол оҕолоох, икки сиэннээх.
Икки сыл буолан баран иккис кыыс Эльвира кэллэ: олус чапчылҕан, олох кыратыттан ыалларын оҕолорун түмэ тардан оонньуу айан оонньоторо. Билигин үрдүк үөрэхтээх юрист. Өр кэмҥэ дознавателинэн үлэлээн майор званиялаах сынньалаҥҥа олорор. Кэргэнэ Дмитрий Васильевич милиция бэтэрээнэ, билигин анал байыаннай дьайыыга сулууспалыы сылдьар. Үс кыыс, үс уол оҕолоохтор, икки сиэннээхтэр.
Үс сыл хаалан күүтүүлээх уолбут Аркадий төрөөбүтэ. Дьиэ таһынааҕы үлэтин бэйэтэ былааннаан толороро, тиэхиньикэҕэ кыра сааһыттан сыстыбыта, онто баһыйан дьоҥҥо сирдэрбэт механизатор буолан сылдьар уонна сылгы иитиитинэн дьарыктанар. Кэргэнэ Оксана Викторовна федеральнай казначейство кылаабынай казначейа. Түөрт уоллаахтар, икки сиэннээхтэр.
Төрдүс оҕобут Наташа сэмэй, чуумпу оҕо буола улааппыта. Үрдүк үөрэхтээх юрист, милицияҕа үлэлээн подполковник званиялаах биэнсийэҕэ таҕыста. Билигин ОЛРР инспекторынан үлэлиир. Кэргэнэ Андрей Афанасьевич эмиэ полиция бэтэрээнэ, биэнсийэҕэ тахсарыгар майор званиелааҕа. Билигин аэропортка САБ начальнигынан үлэлиир. Икки кыыс, биир уол оҕолоохтор.
Кыра кыыс Оля оскуоланы ситиһиилээхтик бүтэрэн, үрдүк үөрэхтээх экономист уонна юрист идэтин ылбыта. Улуус дьаһалтатыгар үлэлии сылдьар. Кэргэнэ Айтал Николаевич улуус баайга-дуолга, сиргэ сыһыаннаһыыларын кэмитиэтигэр үлэлиир. Биир кыыс, үс уол оҕолоохтор.
Оҕолорум бары кыра саастарыттан олус көхтөөх оҕолор. Оскуолаҕа үчүгэйдик үөрэммиттэрэ, билигин бастыҥ үлэһиттэр. Бу барыта ийэбит Розалия Гаврильевна өҥөтө. Кини оҕолорун кэрэҕэ-сырдыкка сирдиирэ, олох муударастарыгар, дьону ытыктыырга, үлэттэн куттаммат буолууга үөрэтэрэ. Билигин даҕаны кини сүбэтэ-соргута барыбытыгар туһалыыр. Ийэбит «Элгээйи» сопхуос Партизаннааҕы отделениетыгар оробуочайынан, олох- дьаһах кэмбинээтигэр парикмахерынан, өр сылларга улуус балыыһатыгар үлэлээн бочуоттаах сынньалаҥҥа олорор. Мэдиссиинэ бэтэрээнэ.
Оҕолорбутунаан, сиэннэрбитинээн отой кыраларыттан бииргэ мастыыбыт-оттуубут, сир астыыбыт. Улахан үлэни бары саба түһэн үмүрүтэбит.
Оттон мин оскуоланы бүтэрэн баран, «Элгээйи» сопхуос Партизаннааҕы отделениетыгар механизаторынан үлэлээбитим. Ол кэннэ хомсомуол райкомун направлениетынан Сунтаардааҕы Ис Дьыала отделыгар ГАИ сотруднигынан үлэҕэ киирбитим. Милицияҕа 28 сыл сулууспалаабытым. Улууска маҥнайгы ГАИ отделениетын тэрийсэн, ГАИ отделениетын начальнигынан, Ис дьыала отделын начальнигын кадрга солбуйааччытынан, баһаарынай сулууспа этэрээтин начальнигынан үлэлээн подполковник званиелаах биэнсийэҕэ тахсыбытым. Онтон Сунтаардааҕы суолу оҥорор-өрөмүөннүүр тэрилтэ начальнигынан, Сунтаар нэһилиэгин баһылыгынан, улуус баайга-дуолга, сиргэ сыһыаннаһыыларын кэмитиэтин бэрэссэдээтэлинэн, билигин улуус бэтэрээннэрин сэбиэтин бэрэссэдээтэлинэн үлэлиибин.
Оҕолорбут, сиэннэрбит, хос сиэннэрбит олохпутун уһатан кинилэр тапталларыгар куустаран олоробут.
Афанасий ВАСИЛЬЕВ,
СӨ норуотун хаһаайыстыбатын үтүөлээх үлэһитэ, Сунтаар улууһун Бочуоттаах олохтооҕо.