Саха төрүт оҕунан ытыы Сунтаарбыт улууһугар кэнники сылларга аһара сайынна. Урут успуорт бу көрүҥүнэн умсугуйар эрэ спортсменнар күрэхтэһэр буоллахтарына, билигин араас таһымнаах тэрилтэлэр спартакиадаларыгар, ыһыахтарга киллэрэн, ким баҕалаах кыттар буолла. Күрэхтэһии сүрүн ирдэбилэ — кыттааччы толору сахалыы таҥастааҕа буолар.
Дьаархан нэһилиэгэр 2022 с. Павел Кырелов баҕалаах оҕолору төрүт оҕунан ытыыга дьарыктаан саҕалаабыта. Аан бастаан улахан кылаас кыргыттара сөбүлээн эрчиллибиттэрэ. Тириэньэр бэйэтин тимир көлөтүнэн, үбүнэн оҕолорун өрөспүүбүлүкэтээҕи «Байанай», ала охтоох Чурапчыга, Бүлүү бөлөх улуустарын икки ардыларынааҕы уонна Сунтаар улууһун күрэхтэһиилэригэр кыттаннаран спортивнай разрядтары ылары ситиспитэ, элбэх уопуту биэрбитэ. «Оҕо оҕону көрөн үөрэнэр» диэн мээнэҕэ эппэттэр. Дьарыкка кэлин өссө, уолаттар, алын кылаас оҕолоро кэлбиттэрэ. Оскуолабыт дириэктэрэ Николай Охлопков өйөөн, саҥа охтору, оноҕостору тутар сиэккэ ылан дьарыктанар усулуобуйа оҥорбута.
Дьаархаҥҥа эрэ буолбакка, улууска аан бастакы оҕолорго буолбут күрэхтэһиини СӨ төрүт оҕунан ытыы федерациятын салайааччыта Виктор Бурцев тэрийсибитэ тэрээһини үрдүк таһымнаабыта. Ол кэннэ улуус үөрэҕириитин спортивнай барылыгар киллэрэн, оҕунан ытыыга күрэхтэһии биһиги нэһилиэккэ буолуталаан барбыта. Павел Револьевич көҕүлээһининэн улууспутугар алын кылаас оҕолоругар, дьиэ кэргэн сылын чэрчитинэн «Дьиэ кэргэнинэн ытыы» күрэхтэһии Дьаархаҥҥа, бу ааһан иһэр сылга «Битва выпусников» күрэхтэһиилэр Сунтаарга бастакытын ыытыллыбыттара.
Бу ый 25 күнүгэр «Дьулуур» чэпчэки атлетика манеһыгар V төгүлүн ыытыллар төрүт оҕунан ытыы күрэхтэһии кыттааччылары күүтэр. Бэрт тыҥааһыннаах, кыраһыабай, элбэх дьаныары эрэйэр күрэхтэһиигэ кэлэн кыттыҥ, көрүҥ диэн ыҥырабыт!
Анна МАРКОВА, Дьаархан
