2026-2027 үөрэх дьылыгар Б.Г.Игнатьев аатынан Дьаархан оскуолатыгар эдэркээн 2 учуутал кыыс кэлбиттэрин истэн кимнээхтэрин, хантан кэлбиттэрин билистим.
Ол курдук, быйыл Бүлүүтээҕи Н.Г. Чернышевскай аатынан педагогическай коллеһы бүтэрбит Сунтаар кыыһа Милана Сидорова быйыл бастакы кылааска киирэр оҕолору үөрэтиэҕэ. Кини Дьаархан оскуолатыгар учуутал миэстэтэ баарын куйаар ситимин уонна Дьокуускайдааҕы үөрэх кэннэ үлэннэн хааччыйыы штабыгар баар биллэриилэртэн көрбүт. «Дьаархан миигин чап-чаҕылхай күнүнэн уонна сып-сылаас тыалынан көрүстэ. Ол туран манна бириэмэ бытааннык, аа-дьуотук устарын өйдөөтүм уонна ханна да ыксаабакка саҥа саҕалыыр саҕахтарым салгынынан тыынным. Үөрэнээччилэрбин уонна төрөппүттэри кытта билсэ таарыйа походтаан кэллибит» диэн санаатын үллэһиннэ. Оттон тоҕо Дьаархан оскуолатын таллыҥ диэн ыйытыыбар маннык хоруйдаата: «Төрөөбүт улууһум оҕолоругар үөрэммит билиибин иҥэрээри, улууһум атын нэһилиэктэригэр хайдах-туох дьаһанан олороллорун билиэх санаам эмиэ баар. Биир тылынан эттэхпинэ, төрөөбүт дойдубар туһаны аҕалаары. Инникитин билиибин, талан ылбыт идэбин үлэнэн бигэргэтэн баран үөрэхпин үрдэтинэр санаалаахпын»
Оттон иккис учуутал кыыс Кэбээйи Сэбээн Күөлүттэн кэлбит Арина Протопопова үөрэнээччилэргэ математика уонна информатика уруогун биэриэҕэ. «ХИФУ ИМИ 4 кууруһун устудьуонабын. Оскуола дириэктэрэ Станислав Кычкин форумҥа сылдьан биҺиэхэ үлэлии кэл диэн ыҥырбыта. Кини ыҥырыытын быһа гыммакка кэллим. Үлэлии-үлэлии үөрэнэн педогогическай уопуппун байытыам диэн санаалаахпын. Иллэҥ кэммэр футболлуурбун сөбүлүүбүн, уопсайбыт аттыгар манеж баарыттан астынным».
Тыа сиригэр саҥа учууталлар кэлэллэрэ саҥалыы сүүрээн, саҥалыы көрүүлэр. Иһийэн турбут олохпут эрчимнэнэн биэрэн саҥа тыыннанар. Учуутал кыргыттарбытыгар ситиһиилэри, истигэн үөрэнээччилэри!
Анна МАРКОВА, Дьаархан