Судаарыстыба быйылгы сылтан саха сирин олохтоохторугар саҥа өйөбүл миэрэлэрин олоххо киллэрэр. Ол курдук социальнай харалта управлениетын иһинэн “Сылаас дьиэ” анал бырагыраама баар буолла. Бу бырагыраама пилотнай бырайыак быһыытынан элбэх оҕолоох дьиэ кэргэттэргэ, доруобуйаларынан хааччахтаах дьоҥҥо уонна соҕотох олорор кырдьаҕастарга олорор дьиэлэригэр тустаах көмөнү оҥорор. Ону тэҥэ баһаартан куттал суох буолуутун хааччыйарга туһуланар.
Биһиги улууспутугар номнуо икки квота көрүллэн, Сунтаардааҕы социальнай харалта, олохтоох дьаһалта, баһаарынай сулууспа уонна технологическэй колледж үлэһиттэрэ ситимнээх үлэни ыыта сылдьаллар. Ол курдук, бу күннэргэ Сунтаар нэһилиэгэр олорор элбэх оҕолоох ыал дьиэтигэр уот ситимин саҥаттан тардан, уларытан биэрдилэр. Матырыйаалын үбэ-харчыта социальнай хантараак чэрчитинэн толору үбүлэннэ. Оттон,уот ситимин уларытааһыныгар Сунтаардааҕы технологическэй колледж устудьуоннара түргэн кэм иһинэн хаачыстыбалаах үлэни толордулар.
Мирослав Яковлев, 1 куурус устудьуона: — Бу дьиэҕэ биһиги 4 буолан үлэлээтибит. Ол курдук, маастарбыт Олег Васильевич сатабыллаах салайыытынан 30-н тахса сыл уларыйбакка турбут уот ситимин уларыттыбыт, розеткаларын уонна 3 уст. конвектары туруордубут. Бу биһиэхэ бастакы уопут буолар, инникитин үөрэхпитигэр, үлэһит дьон буоларбытыгар элбэҕи биллибит. Дьиэ хаһаайыттара олус үөрдүлэр, махтаннылар.
Баһаар тахсар төрүөтэ үксүн эргэ уот ситимиттэн күөдьүйэрин бары бэркэ билэбит. Ордук кыһыҥҥы ыйдарга олус сэрэхтээх. Онон баһаарынай сулууспа үлэһиттэрэ сэрэтэр-өйдөтөр үлэни сылы эргиччи ыыталлар. Холобура, бүгүн бу дьиэҕэ баһаары сэрэтэр тэрили (АДПИ) туруордулар.
“Сылаас дьиэ” саҥа бырагыраама олоххо киирэн, тустаах дьоҥҥо инникитин да улахан өйөбүл буолара саарбаҕа суох.
Елизавета ТИТОВА