Аҕабар
Күлэн- үөрэн, тииһэ кэчигирээн,
Туттан- хаптан хамсанан,
Саҥаран- иҥэрэн кэпсэтэн,
Дьон киһитэ дэнэрэ мин аҕам.
Бултаан-алтаан кэлэрэ,
Байанайдаах булчут бэрдэ.
Үлэни олус таптыыра.
Түргэн-тарҕан туттунуулааҕа.
Икки нэһилиэк тухары
Тымныыттан -итииттэн чаҕыйбакка
Саһаанныыра баһаам элбэҕи.
Туруу үлэһит дэтэрэ,
Эрчимнээх хамсаныылааҕа.
Сиэнин көтөҕөн олороро,
Тойуктаан доллоһутара.
Сахалыы остуоруйа арааһын
Иэйэн туран кэпсиирэ.
Аты сатаан айааһыыра,
Уон икки акка
Оту пиэримэҕэ таһара.
Бөһүөлэккэ аан бастакы
Матасыыкыл көлөлөммүтэ,
Уу мотуорун арааһын баһылаабыта,
Барытын бэйэтэ оҥосторо.
Аҕабыт барахсаны
Саныыр- ахтар эбиппит.
Олус эрдэ барбыта,
Ааспат эбит хомолтото.
Аҕа — күндү киһи.
Аҕа — чугас доҕор.
Аҕа — үтүө санаалаах.
Аҕа — чараас дууһалаах.
Аҕа — мындыр өйдөөх.
ЧЭЛГИЙЭ
Хаартысканы ааптар тиксэрдэ
18.03.2023 сыл.