Мин, Тимофеев Сергей Тимофеевич Сиэйэ нэһилиэгин төрүт олохтооҕо, дойдубар олохсуйан, силис тардан Сиэйэм кыыһын кэргэн ылан 2 оҕону төрөтөн, улаатыннаран орто дойду олоҕун салҕыыбыт. Бэйэм Сиэйэ участковай балыыһатыгар суһал көмө массыынатыгар суоппарынан өр кэмҥэ үлэлээбитим.
Быйыл атырдьах ыйын 24 күнүгэр Сунтаар хирургическай отделениетыгар сахарнай диабеттаах буолан улаханнык ыалдьан киирбитим. Атахпын тута эппэрээссийэлээннэр, иккиһин күн сирин сырдыгын көрдүм. Саҥа үлэлии кэлбит хирург уолга Виталий Бускаровка тылынан кыайан этиллибэт үөрүүбүн, ис сүрэхпиттэн тахсар тылларбын, көмөҕүт, тулуургут уонна «көмүс илиигит» иһин улахан махталбын тириэрдэбин!
Эдэр хирург быраас биһиги улууска кэлэн үлэ үөһүгэр сылдьарын, түүннэри-күнүстэри ыарыһахтары эмтиирин, хас биирдии ыарыһахха олус истиҥ сыһыаннааҕын, үлэтигэр бэриниилээҕин олус хайгыы көрдүм.
Өр кэмҥэ бэйэм доруобуйа харыстабылыгар үлэлээн төһөлөөх элбэх киһини Сунтаарынан, Ньурбанан, Миирнэйинэн таһан быыһаабытым буолуой… Билигин бэйэм сырдык тыыммын үрүҥ халааттаах аанньаллар өрүһүйдүлэр.
Санаан ылыахха, 2020-2021 сылларга хамсык (ковид) ыарыы турбутугар Сиэйэттэн Сунтаарга арыт күҥҥэ 2-тэ киирэн тахсар этибит. Сиэйэ балыыһатыгар ол ыарахан кэммитигэр куораттан биир дойдулаахпыт, бэйэбит кыыспыт Антонина Гаврильева үлэлии кэлбитэ. Тыа балыыһата ыарахан кэмҥэ хайдах дьаһаныахпытын, тугу гыныахпытын билбэккэ олордохпутуна, саҥа бырааспыт сааһылаан харахпытыгар эрэл кыымын умаппыта, төбөбүтүн өндөппүтэ, үөһээ тыыннарбыта.
Сиэйэлэр Антонина Николаевнабытын тас да дьүһүнүнэн, эйэҕэс-уйаҕас майгытынан, саҥарар да саҥатынан киһини үтүөрдэргэ ыытар быраас диибит.
Түгэнинэн туһанан, Антонина Николаевнаҕа махтал тылларын этэбит. Ол ыарахан кэмҥэ балыыһа хас биирдии үлэһитэ хайдах, туох усулуобуйаҕа сылдьыбыттарын бэйэм үлэлээбит буолан, эппинэн-хааммынан билэбин.
Сунтаар хирургия отделениетын бары үлэһиттэригэр, перевязочнай кэбиниэт сиэстэрэтигэр Светланаҕа, дьуһуурунай сиэстэрэлэргэ, медбрат Тимурга, Юраҕа, санитаркаларга, реанимация бары үлэһиттэригэр махтал тылларын салҕыбакка этэбин!
Эндокринолог быраас Степан Васильевич уоппускаттан тахсаат эмпин-томпун көрөн-истэн уларытан биэрэн үтүөрэргэ бардым.
Терапевт быраас Светлана Саввичнаны эмиэ умнубаппын. Махтанан туран дьону эмтиир-быыһыыр үлэҕитигэр, хас биирдии ыарыһахха болҕомтолоох сыһыаҥҥыт уҕараабатын, олох олорорго эрэл кыымын саҕа тураргытыгар баҕа санаабын тириэрдэбин!
Үрүҥ күммүтүн өрүһүйэр,
Үрүҥ халааттаах аанньалларга сүгүрүйэ хаалабын!
Эмтэнээччи Сергей Тимофеев аатыттан суруйдум
Зоя Семенова, Сиэйэ.