«Биир ньыгыл Арассыыйа» партия норуот бырагырааматынан Саха сирэ 18 федеральнай бырайыагы үлэлэтэр. Бу бырайыактар дьиэ кэргэни уонна аҕа саастаах көлүөнэни өйөөһүҥҥэ, үөрэҕириини, доруобуйа харыстабылын, успуорду, култуураны, урбааны, тыа сирин сайыннарыыга, ону тэҥэ куттал суох буолуутун эйгэтин тэрийиигэ туһуланаллар.
Бүгүн биһиги «Доруобай кэскил» (Здоровое будущее) бырайыагынан улууспутугар туох-ханнык үлэ бара турарын туһунан кылгастык билиһиннэрэбит.
Бу федеральнай бырайыак чэрчитинэн ыытыллар дьаһаллар дьон хаачыстыбалаах мэдиссиинэ өҥөтүн туһаныытын, чөл олоҕу тутуһуутун, ыарыыны эрдэттэн булан эмтээһини, уһун үйэлэниини ситиһиини о.д.а. хааччыйар.
Улууспутугар доруобуйа харыстабылын эйгэтин үлэһиттэрэ нэһилиэнньэҕэ өйдөтөр үлэлэри сэргэ, дьоҥҥо доруобуйаларын көрүнэллэригэр араас үөрэхтэри былааннаахтык ыыталлар. Холобур, улуустааҕы поликлиника иһинэн «Доруобуйа оскуолата» үлэлиир. Манна сахарнай диабеттаах, ыйааһыннара улахан дьон хас оптуорунньук аайы сылдьан, быраас бэсиэдэтин истэллэр, хайдах ыйааһын түһэрэргэ, аһы-үөлү сөптөөхтүк дьаһанан аһыырга сүбэлэри ылаллар. Ону сэргэ хааннарын баттааһына үрдүк дьоҥҥо эмиэ туспа оскуола поликлиника иһинэн үлэлиир. Бу оскуолаларга сылдьар дьон олус туһанабыт, бэйэбит күннээҕи эрэсииммитин сөпкө тутуһарбытыгар улахан көмөнү ылабыт диэн этэллэр.
Маны сэргэ профилактика кабинетыгар диспансеризацияны ааһа кэлбит дьоҥҥо быраас үгүс сүбэни-соргуну биэрэр. «Билигин туспа кииннэнэммит нэһилиэнньэҕэ ыытар профилактическай үлэбит кэҥиэ, дьон чөл, доруобай олоҕу тутуһалларыгар тэрээһиннэрбитин элбэтиэхпит. Бу кэлиҥҥи кэмҥэ дьон доруобуйатын көрүнэр буолла диэн көрөбүн», – диэн профилактика кабинетын сиэстэрэтэ Ксения Иванова кэпсиир.
Манна даҕатан эттэххэ, күн бэҕэһээ «Доруобуйа киинэ» диэн ааттаах туспа дьиэлээх-уоттаах профилактика киинэ аһылынна. Манна ким баҕарар сылдьан быраас сүбэтин ылыаҕын сөп. Сөпкө тыыныыга, уһун үйэлэниигэ, чөл олоҕу тутуһарга о.д.а. медиктэр араас дьарыктары, бэсиэдэлэри оҥороллор. Ону сэргэ бу кииҥҥэ психолог өҥөтө эмиэ баар.
Яина ВЛАСЬЕВА