Нэһилиэктэрбитигэр киинэ саалалара арыллан, тыа дьонун олоҕун биллэ сэргэхситэллэр. Бу күннэргэ «Экстра Синема» өссө биир киинэ көрдөрөр саалата Түбэй-Дьаархан нэһилиэгэр аһылынна. Нэһилиэккэ киинэ саалатын арыйар туһунан олохтоохтор бэйэлэрэ куоластаан, талан ППМИ тосхолугар киллэрбиттэрэ. Онон нэһилиэк олохтоохторо бары кэриэтэ үбүлээһиҥҥэ кыттыһан, куораттан итэҕэһэ суох улахан экраҥҥа, киинэ көрөр буолбуттарыттан үөрүүлэрэ үгүс. Бастакы көрбүт киинэлэринэн «Тойон Баай көмүһэ» диэн сахалар устубут киинэлэрэ буолла. Саҥа киинэ саалатын өр сылларга киномеханигынан үлэлээбит, «Киинэ бэтэрээнэ» бэлиэлээх Галина Николаевна Григорьева аатынан «КиноГала» диэн ааттаатылар.
Үбүлээһиҥҥэ кыттыспыт Түбэй- Дьаархантан төрүттээх урбаанньыттарга Михаил Комиҥҥа, Анна Гуриноваҕа, Жека Ураанхайга махталларын тириэрдэллэр.
Мира АФАНАСЬЕВА