Аныгы кэм киинэ проектардарын Экстра Синема хампаанньа таҥан таһаарар. Хампаанньа 2022 сылтан өрөспүүбүлүкэ араас нэһилиэктэригэр 30 киинэ саалаларын арыйан үлэлэтэр. Киин куораттарга курдук тыа сиригэр эмиэ араас киинэлэри көрөр кыах үөскээбитэ. Былырыын Сунтаар улууһугар Сиэйэ, Элгээйи култуура кииннэригэр киинэ саалалара арыллан ситиһиилээхтик үлэлииллэр. Улууска маннык хамсааһын элбэх дьон сэҥээриитин ылбыта. Киинэ тыйаатырдарыгар дьон ордук сахалыы киинэлэри көрүөн баҕарар.
Быйыл Сунтаар улууһун култууратын уонна айылгытын салалтатын көҕүлээһининэн С.А.Зверев-Кыыл Уола аатынан улуустааҕы норуот айымньытын киинэ, Бордоҥнооҕу “Айыллаан”, Кутанатааҕы «Алгыс», Тойбохойдооҕу «Кытылык» култуура кииннэрэ саҥа киинэ көрдөрөр тэриллэринэн хааччыллыахтара. Мария Спиридонова “Айыллаан” КК уус-уран салайааччыта: “Тыа сиригэр киинэ тыйаатырдарын сөргүтүү тосхолугар кыттыһаммыт, улахан куоҥкуруһу ааһаммыт Бордоҥнор араас киинэлэри көрөр кыахтанныбыт. Нэһилиэкпит дьоно киинэҕэ сылдьалларын өр көһүттүлэр. Маннык хамсааһын тыа дьонун култуураҕа сыһыарыы биир көрүҥэ буолар”. Онон сотору кэминэн саҥа киинэ саалалара арыллалларын күүтэбит.
Мира АФАНАСЬЕВА