Сылын аайы олохтоох көҕүлээһини өйүүр бырагыраама (ППМИ) көмөтүнэн араас өрүттээх үлэ ыытыллан нэһилиэк инфраструктурата биллэ тупсар, сайдар.
Ол курдук, Сунтаар нэһилиэгэ былырыын Улуу Кыайыы 80 сылын көрсө бу бырагыраамаҕа бырайыак көмүскээн, Гражданскай уонна Аҕа дойду Улуу сэриитигэр олохторун толук уурбут биир дойдулаах буойуттарбытыгар аналлаах пааматынньыкка сөргүтүү үлэтин ыытар. Бу туһунан нэһилиэк баһылыгын эбээһинэһин толорооччу Семен Николаев иһитиннэрэр.
— 1968 сыллаахха туруоруллубут пааматынньыкка тупсарыы үлэтин “Приоритет Плюс” тэрилтэ ылсан үлэлии сылдьар. Ол курдук, пааматынньыгы саҥардан, кырааскалаан, турар сирин тулатыгар үүммүт оту-маһы кэрдэн, ыраастаатылар. Кумах, гравий куттаран 200 кв.м. тротуар плитката тэлгэниэхтээх. Ону тэҥэ, ыскамыайкалар баар буолуохтара. Саҥардыллыбыт пааматынньыгы балаҕан ыйын 3 күнүгэр – Аан дойду иккис сэриитэ бүппүт күнүгэр сөп түбэһиннэрэн арыйар былааннаахпыт. Бу бырагыраамаҕа кыттарга олохтоох дьон, көхтөөх уопсастыбыньыктар, тэрилтэлэр уонна түөлбэлэр салайааччылара төһүү күүс буолаллар. Онон, кинилэргэ махтанан туран, кэлэр бырайыактарга өссө да үлэлэһэр сорук турар.
Елизавета ТИТОВА