Дойду үрдүнэн ППМИ — олохтоох нэһилиэнньэ көҕүлээһинин өйүүр бырагыраама үлэлээн өрөспүүбүлүкэ, улуус, нэһилиэк аайы араас үлэлэр ыытыллан дойдубут сайдар.
Маар Күөлгэ ППМИ бырагыраама чэрчитинэн, киинтэн ититиигэ чааһынай дьиэлэри холбуур үлэтэ тэтимнээхтик, кэмигэр ыытылла турар. Уопсайа 15 ыал холбонуохтаах, ол иһигэр икки СВО кэккэтигэр сулууспалыы уонна сулууспалаабыт уолаттар төрөппүттэригэр киириэхтээх. Үлэ сүрүн бэдэрээччитэ Роман Иванов кэпсиир:
«Үлэбитигэр сүрүннээн олохтоох уолаттар көмөлөһөллөр, ОДЬКХ маастара Ефим Наумов, Саша Потапов, Марат Саввинов. Үлэбитигэр сүбэһитим убайым Петр Емельянов уонна бу соторутааҕыта СВО-тан кэлбит Андрей Семёнов. Кыра кэмҥэ ардах мэһэйдээн үлэбит атахтана сыста, ол эрэн халлаан көнөн үлэ барар»
Олохтоохтор уһун унньуктаах кыһыҥҥа дьиэлэригэр ититии ситимэ киирэриттэн үөрүүлэрэ үгүс.
Екатерина ИВАНОВА,
уопсастыбанай кэрэспэдьиэн