Атырдьах ыйын 3 күнүгэр, Сунтаар улууһун Наахара нэһилиэгэр «Сплав-фест 2024» диэн бэстибээл бастакытын ыытылынна. Бу бэстибээли Сунтаар улууһун дьаһалтата, ыччат бэлиитикэтин отдела, физическай култуура уонна успуорт отдела, «Бөрө үүтээнэ» сынньанар киин, «EVA_KIDS» уонна «Гифтастик» маҕаһыыннар кыттыһан тэрийэн ыыттылар. Оттон сүрүн успуонсар — Сунтаар улууһун социальнай-экономическай сайдыытын пуондата.
Уопсайа, бэстибээлгэ 5 хамаанда кыттыыны ылла. Ол курдук, Мииринэй оройуонуттан — икки , Ньурбаттан — биир уонна Сунтаар улууһуттан -икки. Хамаандалар үс түһүмэхтээх этафетаҕа, канат тардыһыытыгар, сөтүөлүүр сиргэ волейболга күрэхтэстилэр. Ону сэргэ, зачекка киирбэт көстүүмнээх сааптарынан уонна бэйэ оҥоһук тыыларынан куоталастылар. Ыраах диэбэккэ олус элбэх ыалдьыт, көрөөччү тиийбитэ киһини үөрдэр.
Оттон көрө, сынньана кэлбит ыалдьыттарга араас элбэх тэрээһин тэрилиннэ: маастар-кылаастар, баҕалаахтар уруһуйдаатылар, туойунан арааһы оҥордулар, о.д.а. Ону таһынан араас куонкурус буолла.
Кыайыылаахтары наҕарадалааһын сонуннук ыытылынна. Күрэхтэһии түмүгүнэн, Куокуну нэһилиэгин түмсүүлээх хамаандата бастаата уонна сүрүн бирииһии — 100 тыһ. солк. сэртипикээтинэн наҕараадаланна. Иккис миэстэни Мииринэй оройуона ылан «Бөрө үүтээнэ» сынньалаҥ киинигэр 15 киһиэхэ путевканан наҕараадаланна. Үһүс миэстэ хаһаайына Ньурба улууһа буолла уонна 10 киһиэхэ «Бөрө үүтээнигэр» сынньалаҥҥа путевка тутта. Ыччат тэрээһинэ кыраасканан фейерверинэн түмүктэннэ.
Биһиги улууспут биир кэрэ көстүүлээх, дьикти айылҕалаах сиригэр, Наахара нэһилиэгэр, сайыҥҥы үтүө күҥҥэ олус интэриэһинэй сынньалаҥ тэрээһинэ ыытыллыбыта дьону-сэргэни астыннарда. Инникитин тиһигин быспакка бу сиргэ маннык тэрээһиннэри тэрийиэххэ диэн баҕа санааны хаалларда.
Дмитрий ЫМЫЧАНОВ