Сунтаарга С.А.Зверев-Кыыл Уолун аатынан холбоһуктаах түмэлгэ быыстала суох урамньы араас кɵрүҥүн сырдатар, үйэтитэр, кэрэхсэтэр быыстапкалар тураллар. Бу күннэргэ Сунтаар лиссиэйин түɵрт дьүɵгэлии уһуйааччылар «Урамньы чороонун кɵтɵҕɵн» диэн айар быыстапка тэрийдилэр.
Урамньы чороонун кɵтɵҕɵн… Түɵрт кэккэлэһэ турар чорооннор… Хас биирдии чороон ураты кэрэ, умсугутар, угуйар, кэрэхсэтэр…
Фекла, Изабелла, Анна уонна Ольга — Сунтаар идэни биэрэр кыһатыгар бииргэ үɵрэммит кыргыттар, билигин тутуспутунан Сунтаар лиссиэйигэр айымньылаахтык үлэлиир ааттаах-суоллаах маастардар, уһуйааччылар.
Фекла Потапова оҕо эрдэҕиттэн учуутал буолуон баҕарар ырата лиссиэйгэ туолла. Кини «Ай-Сатаа» киинигэр оҕолору коллаж урамньытыгар уһуйар. Дьэрэкээн ɵҥнɵɵх, күлүмүрдүү оонньуур таас кыырпахтарын силимнээн арааһы бары айан-тутан таһаарар.
ϴрүс таастарын кырыылаан, чочуйан киһи кэрэхсиир киэргэллэрин, оҥоһуктарын Ольга Сосина оҥорор. Кини огранщик идэтин баһылаан Саха сирин онобулугар бастакы алмаас кырыылааччы кэрэ аҥар аатын сүгэр.
Анна Попова — Сунтаар улууһун уран-уус оҥоһуктарын маастара. Уран тарбахтаах маастар оҕолору кылынан, сиэлинэн, туоһунан уһанарга үɵрэтэр. Былырыын трансформер кыл сэлээппэтин үɵрэҕирии дьаарбаҥкатыгар олус сэргии кɵрɵн киэҥ биһирэбили ылбыта. Анна ɵссɵ биир ураты оҥоһуга сапсыыка дэйбиир. Бу икки айар үлэ авторскай бырааптаахтар.
Изабелла Иванова — маһынан уһанар Сунтаар улууһун маастара. Кини чочуйан оҥорбут трансформер чорооно үс иһит буолар оҥоһуулаах. Кытыйа, балҕах, ас хоторор иһит. Саха дьахтарын куукунатыгар олус туһалаах.
Кыргыттар бу айар түһүлгэлэригэр туох баар айбыт-туппут кэрэ айымньыларын киэҥ кɵрүүгэ таһааран дьон кэрэхсэбилин ыллылар.
Сɵҕɵбүн сэргии, хас биирдии чороон сурааһына, оҥоһуута, оһуора-мандара урааҥхай сахабын дэтэр күүһүн, дьүкээбил суһумугар ыалдьыттатар кэрэ бэйэлээх урамньытын…
Тускулаана ГОРОХОВА-КОБЕЛЬЯНОВА