Омос ылан көрдөххө, Сунтаарбыт улууһугар илиилэригэр дьоҕурдаах, сатабыллаах кэрэ аҥаардар олус элбэхтэр. Биир оннук ураты эйгэлээх, дьарыктаах киһинэн Надежда Григорьева буолар. Кини нарын бэйэтэ туохха барытыгар ылсан, кэрэни айар-тутар, тупсаҕай оҥорор. Ол курдук, дьиэтин ис-тас бараанын бэйэтин илиитинэн оҥорбут сиэдэрэй оҥоһуктарынан киэргэтэрин сөбүлүүр. Быраҕыллар чинчилээх эргэ маллары иккис тыыннаан туһаҕа таһаарар. Холобур, кыра хордуон дьааһыктары аныгылыы көрүҥнээн малы-салы харайарга туттар. Дьиэтин иһигэр бэйэтигэр сөп, чөкө муннук оҥостон илии иминэн иистэнэн да ылар. Ону тэҥэ, эгэлгэ сыттаах чүмэчилэри уонна суһуох киэргэлин кытта оҥорон дьоҥҥо бэлэхтиир эбит.
Кэргэнэ Валерий Григорьев эмиэ сатабыллаах хаһаайын. Бэйэ баҕатынан тимири сыбааркалыырга үөрэнэн, дьон сакааһынан арааһы бары оҥорор. Сунтаарга баар тутуу эбийиэктэригэр эмиэ тутаах үлэһит быһыытынан сылдьар. Надежда кэргэниттэн элбэххэ үөрэнэн, маһынан уһанар ону ааһан, тимири сыбааркалаан остуол уонна ыскамыайка кытта оҥорбут.
Дьиэ хаһаайката түбүгэ итинэн эрэ муҥурдаммат. Үүнээйи, оҕуруот араас көрүҥүн үүннэрэн дьиэлээхтэрин үөрдэр. Соторутааҕыта хайы сах минньигэс биэрэстэрин амсайбыттар.
Бу курдук, эдэр ыал олус бэртик дьаһанан олороллор. Надежда этэринэн, күҥҥэ 5 туох эрэ туһалааҕы хайаан да оҥоруохтаахпын диэн санаанан салайтаран, бириэмэни туһалаахтык атаарар. Өссө бу дьарыгын социальнай хантараак нөҥүө көмө туһанан дохуот курдук оҥостуон баҕарар.
Елизавета ТИТОВА