Төрүт түөлбэм төлкөтө» өрөспүүбүлүкэтээҕи ТОС-тар үһүс пуорумнара атырдьах ыйын 1-2 күннэригэр кэрэ айылҕалаах Кыыс Амма сиригэр ыытылынна. Тэрийээччилэринэн Амма улууһун социальнай бэлиитикэҕэ управлениета, СӨ түөлбэлэрин Ассоциацията, СӨ Ыччат дьыалаларыгар уонна социальнай коммуникацияларга министиэрситибэтэ, СӨ муниципальнай тэриллиилэрин Сэбиэтэ буолаллар.
Сунтаар улууһуттан 9 киһилээх бөлөх кыттан кэллэ. Пуорумҥа өрөспүүбүлүкэ араас муннуктарыттан, барыта 9 улуустан уонна Дьокуускай куораттан кытыннылар. Пуоруму ыытыы сыала-соруга – Сахабыт сирин түөлбэлэрин түмэн олохтоох бэйэни салайыныы тиһигин суолталаах боппуруостарынан дьарыктанан сайыннарыы.
Тэрээһин кэмигэр ТОС-тар олоххо киллэрбит бастыҥ бырайыактарын быыстапка-дьаарбаҥката тэрилиннэ, саҥа НКО тэринэргэ сүбэлэр, араас Граннар баалларын туһунан кэпсээтилэр, отчуот оҥоруута уо.д.а. наадалаах тиэмэлэргэ үөрэх ыытылынна.
Нэһилиэк баһылыктарыгар, исписэлиистэргэ аналлаах төгүрүк остуол тэрилиннэ. Онно ТОС сайдыытын, ону тэҥэ бэйэни салайыныы боппуруостарыгар уларыйыылары тула кэпсэтии буолла.
Тэрээһин саҥа сүүрээнинэн «ТОС-фандрайзинг» күрэс буолла. Бу күрэскэ пуорум кыттыылаахтара 1000 солк. усунуос кыттыһан, кыайыылааҕы бэйэлэрэ куоластаан быһаардылар. Онно киирбит үп кыайыылаах бырайыакка уу харчынан туттарыллынна. Ол курдук, 15 бырайыак киирбититтэн Таатта улууһуттан «Теплица» ТОС кыайыылааҕынан таҕыста.
Сунтаар нэһилиэгин «Абаҕа» ТОС салайааччыта Зоя Кузьмина бэйэтин үлэтин уопутун кэпсээтэ. Икки үлэ күнүн түмүгүнэн резолюция ылылынна, дойдуларын туһугар көхтөөх позициялаах актыбыыстарга наҕараадалар туттарылыннылар. Биир үрдүк наҕарааданы сунтаардартан «СӨ Гражданскай көҕүлээһинин туйгуна» бэлиэ Наталия Кокареваҕа иҥэрилиннэ.
Икки күн устата бэйэ-бэйэни билсэн, үлэ уопутун атастаһан, саҥа идеялар үөскээн олус туһалаах сырыы буолла диэн пуорум кыттыылаахтара астыммыттарын биллэрдилэр.
Кинилэр түгэни туһанан ыраах айаҥҥа бэлэмнээн ыыппыт Сунтаар улууһун ыччат бэлиитикэтин салаатыгар, Сунтаар нэһилиэгин олохтоох дьаһалтатыгар махталларын тиэрдэллэр.
Маннык пуорумҥа маҥнайгытын сылдьар Альбина Прокопьева санаата:
– Мин Амма сиригэр бастакы сылдьыым, миэхэ олус долгутуулаах этэ.
Пуорум өрөспүүбүлүкэ араас улуустарыттан биир санаалаах, уопсастыба олоҕор көхтөөхтүк күн бүгүн кытта сылдьар дьону түмтэ.
Тэрээһин үрдүк таһымҥа барбытын бэлиэтиэхпин баҕарабын, сыалын-соругун ситистэ. Биир санаалаах дьоммутун кытары билсиһэн, атах тэпсэн олорон дуоһуйа кэпсэттибит, дьону кытта үлэҕэ саҥа хайысхалары, бырайыактары иһиттибит, биллибит. Араас таһымнаах граннарга хайдах кыттарга элбэх билиини ыллыбыт.
Аммаҕа дьон олоҕун тупсарыыга уопсастыбанньыктар үлэлэрин түөлбэлэринэн сылдьан илэ көрдүбүт, хайҕаатыбыт, сөхтүбүт.
Эр дьон хамсааһына Аммаҕа көхтөөҕүн көрөн астынныбыт, инники үлэбитигэр аммалар үтүө холобурдарын туһаныахпыт диэн эрэллээхпит.
Светлана ЕГОРОВА,
бөлөх салайааччыта